हिरतालिका तीज मनाइयो

काठमाडौंः हिन्दु नारीले आइतबार मुलुकभरका शिवालयमा महादेवको पूजाआराधना गरेर हरितालिका (तीज) मनाएका छन् । काठमाडौं उपत्यकाको आकर्षक पशुपतिनाथ मन्दिरमा लाखौं ब्रतालुले दर्शन र पूजाआराधना गरेका छन् ।

यद्यपि साँझमा पशुपति मन्दिर परिसरमा भक्तजनहरू तनावमा देखिन्थे । हजारौं भक्तजनहरू मन्दिर दर्शनका लागि लाममै रहेका बेला भण्डारीहरूले सात बजेर २० मिनेटमा आरतीलगत्तै मन्दिरका चारै ढोका बन्द गरेका थिए । सामान्यतयाः तिजको बेला साढेआठ नौ बजेसम्म पशुपतिका सबै ढोका खोलिने चलन भए पनि भेटीमा असन्तुष्ट भएर भण्डारीहरूले भक्तहरूको पर्वाहै नगरी ढोका बन्द गरिदिएको स्रोतले जानकारी दिएको छ ।

परापूर्वकालदेखि तिजको दिनमा अविवाहित नारी सुयोग्य वरको कामना र विवाहित महिला पतिको सुस्वास्थ्य र दीर्घायुको कामना गर्दै निराहार बसी भगवान् शिवको दर्शन, पूजाआराधना गर्दै आएका छन् ।

२० वर्षदेखि क्यानडामा बस्दै आएकी सिर्जना गिरीले आइतबार पौने घन्टामै पशुपतिनाथ मन्दिरको दर्शन र पूजा गरिन् । ‘पाँच वर्षअघि आउँदाभन्दा यो वर्ष धेरै व्यवस्थित पाएँ’, उनले भनिन्, ‘पाशुपत क्षेत्रको कोर एरियाभित्र यो वर्षदेखि पुरुषलाई निषेध गरिएकाले खुला महसुस भएको छ । तीन हजारभन्दा बढी स्वयंसेवक हुन्थे तिनको भीडबाट मुक्त भएछ ।’

सँगै आएकी बानेश्वरकी मञ्जु जंगमले भने कोर एरियाबाहिर लाइनको व्यवस्था अव्यवस्थित भएको बताइन् । कोषले यसपटक गौशाला, मित्रपार्क र गुह्येश्वरीबाट लाइन लागेर क्रमशः मन्दिरको दक्षिण, पश्चिम र उत्तर गेटबाट प्रवेश गरी दर्शन र पूजा गर्ने व्यवस्था मिलाएको थियो ।

उनले भनिन्, ‘पहिले चाबहिलदेखि सिनामंगलसम्म र गुह्येश्वरीका साथै पुरानो बानेश्वरबाटै सवारी निषेध गरिन्थ्यो अहिले गाडीकै भीडभाड र धुवाँधुलोबाट लाइन बस्नुपर्‍यो ।’ उनले कोषले माइकिङ नगर्दा कतै आधा, एक घन्टा र कतै तीनचार घन्टामा दर्शन गर्नुपरेको जानकारी दिइन् । बिहान दुई घन्टा परेको वर्षात्का कारण लाइनमा रहेका ब्रतालुलाई समस्या भए पनि दिनभर बादल लागेकाले यसपटक बेहोस हुनेको संख्या एकदमै न्यून रह्यो ।

स्वयंसेवकको व्यवस्था हटाएपछि मूल प्रवेशद्वार पश्चिम गेटमा विगतजस्तो ठेलमठेल र होहल्ला भएन । नित्य दर्शनार्थी पुरुषसमेतका लागि बिहान ६ बजेसम्ममात्र प्रवेश दिइएको थियो । विशेष पूजाका भक्तजनलाई मन्दिरको पूर्व ढोकाबाट प्रवेश गर्ने व्यवस्था मिलाइएको थियो । यसपटकदेखि कोषले एक हजार रुपैयाँ तिरेर गर्न पाउने विशेष पासको व्यवस्थासमेत खारेज गरेको छ । प्रेस, सुरक्षा निकाय, कोषका कर्मचारी र सेवा प्रदायकले आआफ्नै निकायबाट जारी गरिएका परिचयपत्र प्रयोग गर्न पाउने व्यवस्था पहिलोपटक गरिएको थियो ।

कोषका कार्यकारी निर्देशक रमेश उप्रेतीले कोषले सहज दर्शनका लागि यस पटकदेखि स्वयंसेवक र विशेष पासको व्यवस्था खारेज गरेर प्रहरीलाई जिम्मेवारी दिएको जानकारी दिए । उनले भने, ‘लगभग १० हजार पास वितरण हुन्थ्यो, कतिले त डुप्लिकेट बनाएर पनि काम चलाएछन् ।

त्यसैले पास खारेज गर्‍यौं । एक हजार तिरेर विशेष पास लिनेविरुद्ध घन्टौं लाइन लाग्नेले विरोध गरेर भगवान् सबैका समान हुन् भने । त्यसपछि त्यो पनि हटाएका हौं ।’ उनका अनुसार यसपटक करिब चार हजार प्रहरीले सुरक्षासहित लाइनको व्यवस्थापन गरेका थिए ।

यसैबीच राष्ट्रपति विद्यादेवी भण्डारी र प्रधानन्यायाधीश सुशीला कार्कीले साँझ पशुपतिनाथ मन्दिर पुगी दर्शन र पूजा गरेको कोषका सदस्यसचिव गोविन्द टन्डनले जानकारी दिए । उनले भने, ‘यसपटक सात लाखजति ब्रतालुले पशुपतिनाथको दर्शन र पूजा गरेका छन् ।’