अपहरण अभियोगमा इन्स्पेक्टर पक्राउ
![अपहरण अभियोगमा इन्स्पेक्टर पक्राउ](https://annapurnapost.prixacdn.net/media/albums/Shyam-gupta-57cf75add0ddf7.12931977_CZT9uGwGQS.jpg)
काठमाडौंः प्रहरीले पूर्वमन्त्री श्यामसुन्दर गुप्ता प्रकरणमा भैंसेपाटी प्रभागका प्रहरी निरीक्षक अनिल पण्डित र पत्नी हत्या अभियोगमा जेलमा रहेका सशस्त्र प्रहरीका पूर्वडिआइजी रञ्जन कोइरालाकी प्रेमिका तारा रेग्मीलाई पक्राउ गरेको छ । रेग्मीबाट रकम उठाउन गुप्तालाई सहयोग गरेको भन्दै प्रहरीले पण्डितलाई पक्राउ गरी अनुसन्धान थालेको हो ।
पण्डित २०६० सालमा असईमा भर्ना भएका थिए । एक वर्ष सुडान शान्ति मिसनमा काम गरी फर्किएका पण्डित झण्डै ६ महिनाअघि मात्रै खुला प्रतियोगिताबाट प्रहरी निरीक्षक भएका थिए ।
सातदोबाटो वृत्तमा दरबन्दी भएका पण्डित केही समय त्यहाँ काम गरेर भैंसेपाटी प्रभागको इन्चार्ज भएका थिए । डिल्लीबजार कारागारमा चिनजान भएका गुप्ता र पण्डितको सम्बन्ध पछिल्लो समयमा बाक्लिएको थियो ।
त्यही चिनजानको आधारमा गुप्ताले रकम असुली गर्न पण्डितलाई प्रयोग गरेका हुन् । गुप्ताले रेग्मीबाट रकम लिएपछि आकर्षक रकम पण्डितलाई दिने सहमति भएको स्रोतले बताएको छ । पैसा पाउने लोभले पण्डितले गुप्ताको सहयोगी बनी रेग्मीलाई धम्क्याउने गरेका थिए ।
गुप्तासँग पण्डितको डिल्लीबजार कारागारमा चिनजान भएको थियो । गुप्ताले डिल्लीबजार कारागारमा रहँदा पण्डितलाई आर्थिक सहयोग गर्ने गरेका थिए । गुप्ता र पण्डितले मुद्दा मिलाइदिने भन्दै रेग्मीलाई विश्वासमा पारेका थिए ।
उनीहरूले ५० लाख दिनुपर्ने भने पनि रेग्मी त्यति धेरै रकम दिन नसक्ने बताएपछि पण्डित र गुप्ताले रेग्मीलाई धम्क्याउन थालेको स्रोतले बताएको छ ।
रेग्मीको मुद्दाका बारेमा दुवैजना जानकार थिए । प्रहरीलाई खबर गरे तिमी पनि फस्ने भन्दै गुप्ताले तत्काल पैसा दिए मुद्दा छिटै मिलाउने भन्दै रेग्मीलाई धम्क्याउने गरेको प्रहरी स्रोतले बताएको छ ।
गुप्ताले १० लाखदेखि बार्गेनिङ गरे पनि रकम बढाउँदै ५० लाख पुर्याएका थिए । रेग्मीले त्यतिका रकम आफूले दिन नसक्ने बताएपछि गुप्ताले उनलाई धम्क्याउन थालेका थिए । आफूले मात्र रेग्मीबाट पैसा असुल्न नसकेपछि गुप्ताले प्रहरी निरीक्षक पण्डितको सहयोग लिएका थिए ।
ललितपुर प्रहरी प्रमुख (एसएसपी) पीताम्बर अधिकारीले गुप्ता प्रकरणमा प्रहरी निरीक्षकको संलग्नता देखिएकाले उनलाई समेत पक्राउ गरी अनुसन्धान भइरहेको बताए । प्रहरीको खोजी सूचीमा रहेकी रेग्मी लुकिछिपी म्यानपावर व्यवसायको काम गर्दै आएकी थिइन् ।
गुप्ताले १० लाखदेखि बार्गेनिङ गरे पनि रकम बढाउँदै ५० लाख पुर्याएका थिए । रेग्मीले त्यतिका रकम आफूले दिन नसक्ने बताएपछि गुप्ताले उनलाई धम्क्याउन थालेका थिए ।
कोइराला पत्नी गीता ढकालको हत्या प्रकरणमा सहयोगी भूमिका खेलेको भन्दै अदालतले दिएको सजायमध्ये रेग्मीको ११ महिना १० दिनको जेल सजाय बाँकी छ । रेग्मी सशस्त्र प्रहरीका पूर्वडिआइजी रञ्जन कोइरालाकी प्रेमिका हुन् । गुप्ता कोइरालासँगै झण्डै तीन वर्ष जेल बसेका थिए । त्यही बेला कोइरालालाई भेट्न जाने क्रममा रेग्मीको चिनजान गुप्तासँग भएको थियो ।
जेलमा रहँदा कोइरालासँग गुप्ताको निकट सम्बन्ध थियो । जेलबाट छुटेपछि रेग्मी र गुप्ताको सम्बन्ध मुद्दा मिलाइदिने लोभमा झन् बलियो हँदै गयो । जेल सजाय मिनाहा गरिदिने र मुद्दा मिलाइदिने व्यक्ति खोजिरहेका बेला त्यसको जिम्मा गुप्ताले लिएपछि रेग्मी र गुप्ताको सम्बन्ध बाक्लिएको प्रहरीले बताएको छ ।
गुप्ताले पैसा खर्च गर्ने भए मुद्दाको कुनै चिन्ता लिनु नपर्ने रेग्मीलाई भनेका थिए । रेग्मीले समेत मुद्दा मिलाइदिए केही रकम दिन आफू तयार रहेको गुप्तालाई भनेकी थिइन् । पैसा मात्र माग्न तर मुद्दा जस्ताको तस्तै हुने भएपछि गुप्ता र रेग्मीको विवाद सतहमा आएको हो ।
गुप्ताले आफूलाई धम्क्याई रकम असुली गर्न लागेको थाहा पाएपछि रेग्मीले ललितपुर प्रहरीमा गुप्ताविरुद्ध उजुरी दिएकी थिइन् । रेग्मीकै उजुरीका आधारमा प्रहरीले गुप्तालाई सोमबार ललितपुरको ताल्छीखेलबाट पक्राउ गरेको हो ।
गुप्ताविरुद्ध उजुरी दिने रेग्मीलाई समेत प्रहरीले पक्राउ गरी काठमाडौं जिल्ला अदालतमा बुझाएको थियो । अदालतले मंगलबार नै उनलाई जेल चलान गरेको छ । गुप्ताले दिनहुँजसो रेग्मीलाई सयौं कल टेलिफोन गरेर धम्की दिने गरेको प्रहरीले बताएको छ ।
व्यापारी पवन संघाईलाई अपहरण गरेको अभियोगमा साढे तीन वर्ष जेल जीवन बिताएका गुप्ता एक वर्षअघि मात्र जेल मुक्त भएका थिए । गुप्ताले संघाईलाई अपहरण गरी २० दिन काभ्रेको सूर्यखर्कको एक घरमा लुकाएर रकमको बार्गेनिङ गरेका थिए । संघाईबाट त्यस क्रममा ८५ लाख रुपैयाँ असुलेको गुप्तामाथि आरोप लागेको थियो ।
गुप्ताका सहयोगी हेटौडाका विकास लामा भन्ने जितबहादुर गोले र काभ्रेका आकाश लामाले २०६८ पुस १४ मा कमलादी गणेशस्थान दर्शन गर्न गएका बेला बिहान साढे ५ बजे संघाईको अपहरण गरेका थिए । संघाई अपहरणको प्रमुख योजनाकार ठहरिएका गुप्ताले जेल बस्दा समेत भाग्ने प्रयत्न गरेका थिए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)