कसैको स्वार्थका लागि संविधान संशोधन हुँदैनः पोखरेल
धनकुटाः एमालेका महासचिव ईश्वर पोखरेलले कुनै ठोस् एजेण्डा बिना संविधान संशोधन हुन नसक्ने बताएका छन् । धनकुटाको पाख्रीवासमा सुरु प्रदेश एकको कमिटी बैठकलाई सम्बोधन गर्दै महासचिव पोखरेलले कसैको स्वार्थको लागि संविधान संसोधन नहुने बताएका हुन् ।
‘सत्तामा पुर्याउने भर्याङ बनाउन संविधान संशोधन हुँदैन,’ उनले भने, ‘संविधानको विषयमा संसदमा संवैधानिक बहस हुन्छ भने त्यो मान्य हुन्छ ।’
उनले सामाजिक सद्भाव खलवलिने र राष्ट्रिय एकता आँच आउने गरि संविधान संशोधन भए त्यो एमालेलाई मान्य नहुने बताए ।
संविधानलाई कार्यान्वयन गर्ने खोजिएको बेला सत्ताको लालचाले समझदारी भत्काएको आरोप पोखरेलको छ । उनले संविधान निर्माणमा जसरी दलहरु बीच एकता भएको थियो त्यसैगरी कार्यान्वयनमा पनि सहकार्य हुन जरुरी रहेको उल्लेख गरे ।
२०६४ माघ ७ गतेभित्र स्थानीय तहको निर्वाचन नभए संवैधानिक र राजनैतिक संकट हुने विषयमा सरकार गम्भीर नभएको अरोप समेत पोखरेलको छ ।
प्रतिक्रिया दिनुहोस !
