पहिरोको डरले सारिँदै बस्ती
सन्धिखर्कः सन्धिखर्क नगरपालिका ९ खाँचीकोट भुजुंगेमा जमिन भास्सिएपछि ५६ घर परिवार त्रासमा बाँचिरहेका छन् । वर्षात्को समयमा जमिन भासिने क्रम बढेपछि स्थानीय त्रसित भएका हुन् ।
यहाँका अधिकांश घर चर्किका छन् । सिंगो बस्ती भएको डाँडो भास्सिएको छ । रात नपरे पनि हुन्थ्यो जस्तो लाग्ने गरेको स्थानीय शुभकला नेपालीले गुनासो पोखिन् । जिल्ला दैविक प्रकोप उद्धार समिति अर्घाखाँचीको पहलमा भूगर्भविद्को समूहले स्थलगत निरीक्षण गरेपछि यहाको बस्ती पहिरोको उच्च जोखिममा रहेकोले स्थानान्तरण गर्न निर्देशन दिएको छ । जुनसुकै समयमा बग्न सक्ने भएकाले तत्काल बस्ती सार्नु पर्ने निष्कर्ष विज्ञहरूले निकालेका हुन् ।
जोखिमयुक्त क्षेत्रमा ५६ घर परिवारमध्ये ५१ दलित घरपरिवार बसोबास गर्दै आएका छन् । यहाँ पढेलेखेका र टाठा बाठा छैनन् । उनीहरूको पहुँच नपुगेका कारणले गर्दा जोखिम मोलेरै भए पनि दुई वर्षदेखि बस्नु परेको उनीहरूले गुनासो गरे ।
जिल्ला दैविक प्रकोप उद्धार समितिले भुजुंगेको बस्ती सार्न उपयुक्त स्थानको खोजी गर्न र स्थानीयको भावना समेटेर अगाडि बढ्न कांग्रेसका जिल्ला सभापति विष्णुप्रसाद खनालको संयोजकत्वमा सर्वदलीय टोलीलाई जिम्मा दिएको छ ।
बस्ती सार्न स्थानीयको मनोभावना बुझ्न जिल्लाको सर्वदलीय टोलीले भुजुंगेमा गएर स्थानीयसँग अन्तक्र्रिया गरेको छ । कांग्रेस सभापति खनालको संयोजकत्वमा गएको सर्वपक्षीय टोलीले बस्ती सर्ने विषयमा स्थानीयको भावना बुझेको हो ।
सर्वपक्षीय टोलीसँग स्थानीय पहिरोको उच्च जोखिममा रहेका बासिन्दाले आवाससहित खेतीपाती गरेर खान मिल्ने स्थानमा लैजान आग्रह गरे । सकेसम्म सन्धिखर्क नगरपालिकाभित्र र नभए खेती गर्न मिल्ने जग्गासहित आवासको समेत व्यवस्था गरी बस्ती सार्नुपर्ने स्थानीय गणेश हितांगले आग्रह गरे ।
तीन स्थानमा १ सयदेखि २ सय ५० मिटर लम्बाइ २० देखि ३० मिटर चौडाइका ठूला पहिरोहरू र चारवटा साना पहिरो गएका छन् । वर्षात्को समयमा बढी पानी निस्कने चारवटा मूल पनि रहेका छन् ।
स्थानीयवासीसँग छलफल गर्न कांग्रेस सभापति खनालसहित, एमालेका जिल्ला सचिव रामबहादुर चौहान, माओवादी केन्द्रका जिल्ला संयोजक ठाकुर विक, राप्रपाका जिल्ला अध्यक्ष देवीबहादुर खड्का, राजमोका सागर केसीलगायतको टोलीले पहिरोपीडीतसँग छलफल गरेको थियो ।
प्रतिक्रिया दिनुहोस !
