काठमाडौँः नेपाली क्रिकेटलाई माथि उठाउन महत्वपूर्ण योगदान दिएका नेपाली क्रिकेट टिमका पूर्वप्रशिक्षक पुबुदु दासानायके अमेरिकी क्रिकेट टिमको प्रशिक्षक बनेका छन् ।
चार वर्षे कार्यकाल र थप एक वर्ष गरेर पाँच वर्षसम्म नेपाली क्रिकेट टिमको प्रशिक्षक बनेर महत्वपूर्ण उपलब्धि दिलाएका पुबुदु अमेरिकी प्रशिक्षक भएका हुन् । बिहीबार मात्र उनी अमेरिकी प्रशिक्षकमा नियुक्त भएका छन् । सन् २०११ देखि २०१५ सम्म नेपाली क्रिकेट टिमको प्रशिक्षक बनेर नेपाली क्रिकेटमा महत्वपूर्ण उपलब्धि सिर्जना गर्न सफल भएका पुबुदु श्रीलंकाका पूर्वविकेटर किपर ब्याट्सम्यान हुन् ।
अमेरिकी क्रिकेट टिमको प्रशिक्षक नियुक्त भएपछि उनले अमेरिकी क्रिकेटको भविष्य राम्रो हुने आशा व्यक्त गरेका छन् । उनले अमेरिकी क्रिकेट टिमको प्रशिक्षक हुन पाउँदा खुशी समेत व्यक्त गरेका छन् ।
‘नयाँ जिम्मेवारी पाएकोमा म खुसी छु, अहिले अमेरिकाको क्रिकेट सुधार गर्नुपर्ने समय भएको छ त्यसैले यो जिम्मेवारी पाउँदा खुशी छु,’ अमेरिकी टिमको प्रशिक्षक नियुक्ति भएपछि उनले भने, ‘कडा मिहिनतको आवश्यकता छ म आशा गर्छु भविष्य राम्रो छ ।’
पुबुदु नेपाली क्रिकेट टिमको प्रशिक्षक हुँदा नेपाल विश्व क्रिकेट लिग डिभिजन ४ बाट वल्र्ड क्रिकेट लिग च्याम्पियनसीप बनेको हो । पुबुदुकै प्रशिक्षणमा नेपालले सन् २०१४ मा टि ट्वान्टी विश्वकपसम्मको यात्रा गरेको छ ।
प्रतिक्रिया दिनुहोस !
