' राजतन्त्र हटेपछि मैले अमेरिकी ग्रीनकार्ड लिएँ'

नेपाली चलचित्र उद्योगमा हिट बनिरहेका बेला नायक रमेश उप्रेती अमेरिकातिर हानिए । २०६२/६२ को जनआन्दोलनले आजित भएर केहीदिनका लागि अमेरिका गएका उनी सात वर्ष बसे । 'नेपालको अवस्था झन् बिग्रियो, राजसंस्था गयो', उनले भने-'त्यसपछि मैले ग्रीनकार्डका लागि प्रोसेस गरेँ । त्यसपछि म त्यतै बसेँ ।' 

करिब ७५ वटा चलचित्रमा अभिनय गरेका रमेश यति बेला 'ब्रासलेट' लिएर दर्शकमाझ आएका छन् । उनीसँग अन्नपूर्णकर्मी नीतु घलेले गरेको कुराकानी ।

'ब्रासलेट' चलचित्र गर्ने भनेर नेपाल आउनुभएको हो ?

हैन यो चौथो चलचित्र हो । तीनवटा अस्वीकार गरेर ब्रासलेटमा काम गर्ने निर्णय गरेँ । यो तीजका अवसरमा रिलिज भएको थियो ।

धेरैपछि काम गर्दा कस्तो लाग्यो ?

दुई, तीनदिन सम्म नर्भस भएको जस्तो, रुट नपक्रेको जस्तो, असजिलो लाग्यो विस्तारै बानी पर्यो ।

'ब्रासलेट' कस्तो चलचित्र हो?

यसमा लभ स्टोरी, सस्पेन्स, थ्रिलर, एक्सन सबै कुराको सम्मिश्रण छ । काल्पनिक विषयवस्तु उठाइएको छ । पुनर्जन्मका कुरा गरिएको छ । आत्मा न कहिले जन्मन्छ न कहिले मर्छ भन्ने कुराहरु देखाइएको छ ।

दर्शकको प्रतिक्रिया कस्तो पाउनुभयो ?

लामो समयपछि आउने भएकाले कस्तो चलचित्रबाट कमब्याग गर्ने । ब्रासलेटमा फरक भूमिका गरेको छु तर दर्शकले एक्सन, लभस्टोरीमा आधारित चलचित्र गरेको सुहाउने प्रतिक्रिया दिए । कहिलेकाँही फरक विषय गर्दा सुहाउँदैन । मेरो चलचित्रले एभरेज मात्र मार्केट लियो ।

नयाँ स्वादका चलचित्रसँग प्रतिस्पर्धा गर्न गाह्रो भएको हो ?

अहिलेका चलेका केही कथाहरु सिनेमा हैनन, विषयगत रुपमा हेर्दा त्यो डकुमेन्टी हो । यी चलचित्र चलेर चलचित्र उद्योगलाइ कुनै फाइदा गर्दैन । चलचित्र भनेको हेर्दा आँखामा रमाइलो हुनुपर्छ । दोहोर्याएर हेर्न मन लाग्ने खालको हुनुपर्छ । अहिलेका नयाँ चलचित्र कहिलेकाँही फरक स्वादका लागी मात्र काम लाग्छन् । हामीले घरमा भुजा खाएर बाहिर ढिडो खान गए जस्तै हो ।

तर कालोपोथी जस्तो चलचित्र हिट भयो ।

वास्तवमा मान्छेले इतिहास भुल्न चाहन्छ । आफनै दाजुभाइ मारेको विषय हेर्न चाहँदैन । हामीले प्रमुखधारलाइ छोडेर काम गर्नु हुन्न । त्यो त सबै डकुमेन्टी बनाए भै हाल्यो नी ।

परिवर्तन चाहिँदैन भन्न खोज्नुभएको हो ?

पक्कै चाहिन्छ । तर हर निर्देशकले उसको सोँच अनुसार चलचित्र बनाएको हुन्छ । आम मान्छेलाइ थाहा हुनुपर्यो त्यो निर्देशकले कस्तो चलचित्र बनाउँछ भनेर ।

यो चलचित्रमा काम गर्न केले आकर्षक गर्यो ?

सुरुमा कथा सुनेपछि म भावुक भएँ । विषयवस्तु राम्रो लाग्यो । म चलचित्र गर्दा सम्बन्धलाइ ध्यान दिन्छु, ब्यापार हैन । राम्रो सिनेमा छोडेछु धेरै पटक । किनकी म सम्बन्धलाइ प्राथमिकता राख्छु । कसले कस्तो समयमा सहयोग गरेको छ त्यसको महत्व बुझनुपर्छ । यस्तो निर्णय गर्दा कतिले मलाइ रमेश उप्रेती खुस्किएछ पनि भनेकाछन् ।

चलचित्रमा कसरी आउनुभयो?

मलाइ स्वर्गीय दिपक रायमाझीले ल्याउनु भएको हो । रगत नामको चलचित्रबाट नेगेटिभ रोलमा छिरेको थिएँ म । उहाँले हिरोको रोल दिनुभयो । मलाइ हिरो बनाएको उहाँले हो ।

विदेश किन जानु भएको ?

म मोनोटोनस भएकोले अमेरिका गएको थिएँ । सधै एउटै डाइलग, चलचित्र सबै कुरा वाक्क भयो । म प्रत्येक वर्ष विदेश घुम्न जान्थे । त्यतिबेला नेपालको अवस्था पनि खराब थियो । घुम्न मात्रै अमेरीका गएको थिएँ । ६ महिनाको भिसा थियो । बस्दै गएँ, नेपालको अवस्था झन् बिग्रियो, राजसंस्था गयो । त्यसपछि मैले ग्रीनकार्डका लागि प्रोसेस गरेँ । त्यसपछि म त्यतै बसेँ ।

नेपाली चलचित्रको स्तर कस्तो लाग्छ ?

पछिल्लो समय भल्गर चलचित्रहरु बनेँ । छाडा डाइलगहरु सुँने । केटा मान्छेले सुन्न नसक्ने खालका डाइलग केटीहरुले कसरी सुन्न सक्छन् । चलचित्रमा भएका यस्तै विकृतीको देखेर मलाई बस्न मन लागेन र फेरि अमेरिका फर्किए ।

अहिले केमा व्यस्त ?

चलचित्र 'ऐश्वर्या' बनाउने क्रममा छु । यसमा हिरो म आफै । केकी अधिकारी र दिपीका प्रसाइ हिरोइन छन् । सायद अर्को वर्षसम्म रिलिज होला । प्री–प्रोडक्सनको काम भइरहेको छ । करिब डेढ करोड खर्चमा बन्छ । बैंकक, भारतलगायत अन्य देश मा सुटिगं गर्ने तयारी छ । काठमाडौमा भएका धेरै कुरा कलात्मक रुपमा प्रस्तुत गर्नेछु ।

दर्शकको चाहना अनुसारको चलचित्र हो यो । ऐश्वर्याले निर्धारण गर्नेछ मेरो अगाडीको गन्तब्य । यो चलचित्र चलेन भने चलचित्र क्षेत्रमा सायद नहुन सक्छु ।

विदेशमा कसरी समय बित्यो ।

विदेशमा काम भएन भने सम्मान हुँदैन, तर जस्तो काम गरे पनि सम्मान हुन्छ । काम यस्तो उस्तो भन्ने हुँदैन । त्यहाँ स्टेज कार्यक्रम धेरै गरिन्थ्यो । धेरै भन्दा धेरै शोहरु हुन्थ्यो । नेपाली कम्युनिटीले विभिन्न कार्यक्रममा व्यस्त भएँ , त्यो बाहेक आफनो काम छँदैथियो । तर मेरो पेशाले बारम्बार घचघचाउँथ्यो । नत्र म फर्केर आउँने थिइन् ।

विदेशमा के भन्थे नेपालीहरुले?

मेरो प्रशंसकहरु धेरै रहेछन् विदेशमा । जुन कारण मलाइ धेरै नै उर्जा मिल्थ्यो पुन काम गर्न । तर समस्या के भने, यो चलचित्र हेर भनेर उनीहरुलाइ कुनै चलचित्रको नाम दिन सकिन । गुणस्तरीय चलचित्र नभएरै हो । त्यसैले मैले ऐश्वर्या बनाउन लागेको हो । पैसा कमाउनको लागी हैन । बरु, दुईचार लाख घाटा सहन तयार छु । राम्रो चलचित्र बनाउँछु ।

नेपाली चलचित्र उद्योगको समस्या ?

राम्रो चलचित्र बनाउनको लागी बजेटको अभाव छ हामीकहाँ । प्राविधिक रुपमा अब्बल छौ । कलाकारहरु एकसेएक राम्रा छन् । तर पैसा लगानी गरेर उठ्नै सक्दैन । सबै भन्दा ठुलो कुरा ब्यापार हो नी । त्यसैले राम्रो चलचित्र बन्दैन ।

विदेश जाने कलाकारको फर्कंने क्रम सुरु भएको हो ?

म हिट हुँदाहुँदै गएको थिए, त्यही कुराले पिरोल्थ्यो त्यसैले पनि म आएको हो । पलायन भएको होइन । मैले करिश्मा जी, सरोज दाइसँग फर्किनुपर्छ भन्ने कुरा गर्थेँ । अहिले आएँ, एउटा चलचित्र बनाउँदैछु यो सफल भएन भने पनि पछुतो हुँदैन मलाइ । किनकी मैले कोशिस त गरेँ नी ।

अब कहिले फर्कनुहुन्छ ?

'ऐश्वर्या' बनिसकेपछि प्रमोट गर्न जान्छु २०१७ मा ।

अमेरिका बसाई कस्तो रह्यो ?

सुरुमा निकै गाह्रो थियो । विस्तारै त्यहाँको कानुनी र टेक्निकल कुरा बुझेँ । विस्तारै बानी पर्‌यो । अब त केही लाग्दैन, सिस्टमसँग परिचित भएँ । म यहाँ केही गर्दैन थिएँ होला, उतैबाट धेरै कुरा सिक्न पाएँ ।