बलिउडका प्रख्यात अभिनेता अमिताभ बच्चनले सोमबार आफ्ना नातिनीहरूलाई सम्बोधन गरी लेखेको पत्र अहिले भाइरल बनेको छ । आफ्ना छोरा अभिषेक र बुहारी ऐश्वर्याबाट जन्मेकी नातिनी आराध्या एवं छोरी श्वेता र ज्वाइँ निखिलबाट जन्मेकी नातिनी नव्यालाई सम्बोधन गरी लेखेको यो पत्रमा बच्चनले लैंगिक विभेदविरुद्ध आफूलाई उभ्याएका छन् । प्रस्तुत छ, बच्चनको पत्रको नेपाली अनुवादः
-मेरा प्रिय नव्या र आराध्या
तिमीहरूले आफ्ना कलिला काँधहरूमा निकै मूल्यवान् विरासत बोकेका छौ । आराध्या तिम्रो काँधमा तिम्रा जिजुबाजे डा. हरिवंश राय बच्चनको विरासत छ भने नव्या तिम्रोमा श्री एचपी नन्दाको । तिमीहरू दुवैका जिजुबाजेले तिमीहरूलाई प्रख्यात यश, प्रतिष्ठा र मान्यता भएको थर दिनुभएको छ ।
तिमीहरू दुवै नन्दा वा बच्चन हौ तर तिमीहरू केटीहरू पनि हौ... महिलाहरू !
र तिमीहरू महिला भएकैले मानिसहरूले आफ्ना विचार र बन्धनहरू तिमीहरूमाथि थोपर्नेछन् । उनीहरूले तिमीहरूलाई भन्नेछन्- के लगाउने, कसरी लगाउने, कसरी व्यवहार गर्ने । उनीहरूले निधो गर्नेछन्- तिमीहरूले कसलाई भेट्न हुन्छ, कहाँ जान हुन्छ, कहाँ हुँदैन । मानिसहरूको धारणाको छायामा नबाँच । आफ्नै ज्ञानको प्रकाशमा आफ्नो रुचि आफैं बनाऊ ।
कसैलाई पनि तिमी आफ्नो स्कर्टको लम्बाइमा आफ्नो चरित्र नाप्छौ भन्ने नगराऊ । कसैलाई पनि तिम्रो साथी को हुनुपर्छ भन्ने धारणा बनाउन वा कोसँग तिमीले मित्रता गाँस्नुपर्छ भन्ने निर्णय गर्न नदेऊ ।
तिमीले विवाह गर्न चाहनेबाहेक अरू कुनै पनि कारणले विवाह नगर । मानिसहरूले कुरा काट्नेछन् । उनीहरूले सम्भवतः भयानक कुरा गर्नेछन् । तर, यसको अर्थ तिमीले सबैको कुरा सुन्नुपर्छ भन्ने होइन । 'मान्छेले के भन्लान्' भन्नेमा कहिल्यै चिन्तित नहोऊ ।
तिम्रा हरेक कामको अन्त्यमा त्यसको परिणामसँग जुध्ने तिमी नै हुनेछौ, त्यसैले तिमीबारेको निर्णय अरूलाई गर्न नदेऊ ।
नव्या- तिम्रो नामसँग जोडिएको थरले दिने सेवासुविधाले तिमी महिला भएकैले सामना गर्नुपर्ने समस्याहरूबाट जोगाउने छैन ।
आराध्या- तिमीले यो पत्र पढ्ने र बुझ्ने बेलाको हुँदासम्म सम्भवतः म रहनेछैन । तर मलाई लाग्छ, मैले आज भनेको त्यति बेला पनि सान्दर्भिक हुनेछ ।
यो संसारमा महिला हुनु गाह्रो छ । तर मलाई विश्वास छ, तिमीहरूजस्तै महिलाले यो संसार फेर्नेछौ । आफ्ना सीमा आफैंले तोकेर, आफ्नो निर्णय आफैंले गरेर, मानिसहरूको धारणाबाट माथि उठेर यो काम गर्न त्यति सजिलो हुनेछैन । तर, तिमीहरू... तिमीहरू जहाँसुकैका हरेक महिलाका निम्ति उदाहरण बन्न सक्नेछौ ।
यसै गर र यस्तो गर्दा तिमीहरूले मैले अहिलेसम्म गरेभन्दा धेरै गरेको हुनेछौ । र, त्यति बेला अमिताभ बच्चनभन्दा पनि तिमीहरूका हजुरबुवा भनेर चिनिँदा मलाई बढी सम्मान हुनेछ ।
मेरो सम्पूर्ण मायासहित ।
तिमीहरूका दादाजी... तिमीहरूका नाना ।
अनुवादः लक्ष्मण श्रेष्ठ
प्रतिक्रिया दिनुहोस !
