‘आरोप’मा किशोरी मनोविज्ञान
काठमाडौंः शारीरिक र मानसिक रूपमा परिवर्तन भइरहेकी किशोरीको मनमस्तिष्कमा के चलिरहेको हुन्छ ? यो विषय धेरैका लागि धेरैका लागि महत्वपूर्ण हुँदैनन् । बालबालिकाको कुरा विषयमा खासै ध्यान नदिने हाम्रो समाजमा किशोरकिशोरीलाई पनि त्यही समूहमा राखिन्छ ।
उनीहरूको कुरा सुन्ने र तिनलाई गम्भीरतापूर्वक लिने संवेदनशीलता छैन । यतिबेला उनीहरू पूर्ण रूपमा परिपक्व भइसकेका हुँदैनन्, न त बालबालिका नै रहन्छन् । उनीहरूको व्यवहारमा आएको परिवर्तनलाई नबुझिदिँदा कस्तो परिस्थिति सिर्जना हुन्छ ? यसको जवाफ मण्डला थिएटरमा मञ्चन भइरहेको नाटक ‘आरोप’मा थोरै भए पनि पाउन सकिन्छ ।
एउटी किशोरीको एकांकीपन नाटकमा देखाइएको छ । किशोरी सौरभीको चरित्रमा कलाकार एना देउजाले आफूलाई सर्लक्कै ढालेकी छन् । उनको अभिनयले नाटकलाई जीवन्त बनाएको छ । आमा, बुबा र दाजु विदेशमा, दिदी प्रेमसम्बन्धमा चुर्लुम्म हुँदा सौरभीको भावना र चाहनामा पुगेको चोट नाटकमा देखाइएको छ ।
थाहै नभएको सामान्य जस्तो लाग्ने कुराले किशोरकिशोरीको मस्तिष्कमा पार्ने गम्भीर असरलाई नाटकमा देखाइएको छ । सानो जस्तो लाग्ने यो गम्भीर विषयवस्तुमा बहस हुने गरेकै छैन । लामो जीवनको एउटा छोटो पाटोलाई नाटकमा समेटेका हुन् निर्देशक विकास जोशीले ।
आफैं किशोर हुँदा र आफ्ना बहिनीहरूको किशोरावस्थाको भोगाइहरूलाई स्मरण गरेर नाटकको परिकल्पना तयार भएको हो । नाटकमा युवतीले आफ्नो एकांकीपनको दोषी दिदीको प्रेमीलाई बनाएकी छन् । समाजमा धेरै किशोरीले यसरी परिवार र समाजलाई आरोप लगाइरहेका होलान् । विकासले यो आरोप आफैंले खेपेका छन् ।
नाटकले १५ वर्ष अगाडिको समयलाई समातेको छ । नाटकमा प्रस्तुत भएको युवा उत्सव विदेश जाने साथीहरूको बीचमा रहेर पनि स्वदेशमै रमाउने कोसिस गरिरहेको छ ।
अन्त्यमा ऊ बेपत्ता भएको समाचारले द्वन्द्वकालको झल्को दिन्छ । गाउँले ठिटो उत्सवको भूमिकामा सन्दीप श्रेष्ठ र सौरभीकी दिदी मौसमीको भूमिकामा परीक्षा लामिछाने निकै सुहाएका छन् । परीक्षाको संवाद कहीँ केही नमिलेजस्तो लाग्छ । नाटकको राम्रो पक्ष मञ्च सजावट मान्नुपर्छ । पिटर प्रिन्स र सुरज श्रेष्ठको पनि अभिनय रहेको नाटक असोज २ गतेसम्म मञ्चन हुनेछ ।
प्रतिक्रिया दिनुहोस !
