वायुसेवा निगमको आन्तरिक उडान घाटा चुलियो

काठमाडौंः राष्ट्रिय ध्वजावाहक नेपाल वायुसेवा निगमको आन्तरिक उडान घाटा ह्वात्तै बढेको छ । निगमलाई आन्तरिक उडानतर्फ गत आर्थिक वर्षमा ३२ करोड ९० लाख रुपैयाँ घाटा भएको छ । घाटा अघिल्लो आर्थिक वर्षको तुलनामा यो १८ करोड ७८ लाख रुपैयाँले बढी भएको निगमले संस्कृति, पर्यटन तथा नागरिक उड्डयन मन्त्रालयसमक्ष पेस गरेको तथ्यांकमा उल्लेख छ ।

पर्यटन मन्त्रालयले बिहीबार आयोजना गरेको वार्षिक प्रगति समीक्षा कार्यक्रममा पेस भएको तथ्यांकअनुसार निगमले गत वर्ष दुईवटा १९ सीटे ट्विनअटर जहाज वर्षैभरि सञ्चालन भएका थिए । चीनले अनुदानमा दिएको ५६ सिट क्षमताको एमए ६० जहाज पनि अधिकांश समय सञ्चालन भएको थियो । निगमसँग भएको १८ सिटे वाई १२ नामक चिनियाँ जहाज भने एक वर्षदेखि नै थन्किएको छ । अर्को एक ट्विनअटर जहाज पनि इन्जिन नभएका कारण तीन वर्षदेखि थन्किएर बसेको छ ।

निगमले तीनवटा जहाज उडाउँदा ५४ करोड ८० लाख रुपैयाँ खर्च भएको छ जब कि आम्दानी भने जम्मा २१ करोड ९० लाख रुपैयाँ रहेको पर्यटन मन्त्रालयका सहसचिव डण्डुराज घिमिरेले प्रस्तुत गरेको तथ्यांकमा उल्लेख छ । यसको कारण चिनियाँ जहाज र सरकारी प्राथमिकतामा आन्तरिक उडान नपर्नु भएको जनाइएको छ ।

वायुसेवा निगमका महाप्रबन्धक सुगतरत्न कंसाकारले निगमको आन्तरिक उडानमा वार्षिक घाटा हरेक वर्ष बढ्दै गएको बताए । उनका अनुसार एकै वर्ष करिब ३२ करोड ९० लाख रुपैयाँ घाटा हुनुले आन्तरिक उडान निकै कमजोर रहेको देखाएको छ ।

निगमका अनुसार गत वर्ष आन्तरिक उडानमा जम्मा ३२ प्रतिशतमात्रै लक्ष्य प्राप्त भएको छ । आन्तरिकतर्फका घाटालाई अन्तर्राष्ट्रिय उडानबाट कमाएको नाफाबाट पूर्ति गर्ने गरेको निगमले जानकारी दिएको छ । सरकारको नीति नै अन्तर्राष्ट्रिय उडानबाट नाफा कमाएर आन्तरिक उडानमा खर्च गर्ने रहेको निगमको भनाइ छ ।

अन्तर्राष्ट्रियतर्फ भने ५४ करोड नाफा

निगमले अन्तर्राष्ट्रिय उडानबाट भने एक वर्षमै ५४ करोड १५ लाख रुपैयाँ नाफा कमाएको छ । निगमको अन्तर्राष्ट्रिय उडानमा नाफा र आन्तरिक उडान घाटामा भए पनि समग्र अवस्था भने नाफामै रहेको छ । समग्रमा गत वर्ष २१ करोड २५ लाख रुपैयाँ नाफामा रहेको निगमको भनाइ छ ।
निगमले दुईवटा एयरबस न्यारोबडी जहाज थपेर उडान गर्न थालेपछि नाफा कमाउन थालेको छ ।

दसैंलाई एउटा ट्विनअटर थप हुने

वायुसेवा निगमको थन्किएको एउटा ट्विनअटर जहाज दसैंमा सञ्चालनमा आउने भएको छ । आन्तरिक उडानतर्फको यो जहाज झन्डै तीन वर्षदेखि थन्किएको छ । बिग्रिएको यो जहाज मर्मत गरेर आगामी दसैंमा नियमित उडानमा ल्याउने निगमका इन्जिनियर पोषक ज्ञवालीले जानकारी दिए । ज्ञवालीले यो जहाज उडाउन मर्मत भइरहेको जानकारी दिएका छन् । उनका अनुसार आठ करोड खर्च गरेर दसैंका लागि थप एक जहाज उडाउने तयारीमा निगम छ । हाल निगमले दुईवटा ट्विनअटर विमानबाट उडान गर्दै आएको छ ।