सुरु भयो फुड एन्ड फन फेस्टिभल
नेपालगन्जः सिद्धार्थ बिजनेस ग्रुप अफ हस्पिटालिटी प्रालिले शुक्रबार नेपालगन्जमा सिद्धार्थ फुड एन्ड फन फेस्टिभल सुरु गरेको छ । बाँकेका प्रमुख जिल्ला अधिकारी रविलाल पन्थले सिद्धार्थ कटेज एन्ड रेस्टुरेन्टमा फेस्टिभलको उद्घाटन गरे ।
प्रमुख जिल्ला अधिकारी पन्थले पछिल्लो समयमा वस्तु व्यापारभन्दा सेवा व्यापार फस्टाउँदै गएको बताए । उनले होटल व्यवसाय सेवा व्यापार भएको बताउँदै होटलको विकासले देशको विकासमा टेवा पुग्ने धराणा व्यक्त गरे ।
नेपालगन्ज उद्योग वाणिज्य संघका कार्यवाहक अध्यक्ष अब्दुल वाहिद मन्सुरीले होटल व्यवसाय विस्तारसँगै नेपालगन्ज मानसरोवरको प्रस्थान विन्दु बन्दै गएको बताए ।
होटल व्यवसायी संघ बाँकेका अध्यक्ष निमबहादुर थापाले नेपालगन्जमा होटल व्यवसाय फस्टाउँदै गएको बताए । उनले नेपालको पर्यटन प्रवद्र्धनका लागि होटलको महत्वपूर्ण भूमिका हुने बताए ।
प्रालिका कार्यकारी प्रमुख कृष्ण न्यौपानेले अन्तरिक घुमफिर वर्षको अवसर पारेर फुड एन्ड फन फेस्टिभल गरिएको बताए । उनले देशभरिका सिदार्थका परिकार फेस्टिभलमा उपलब्ध हुने बताए । उनले सिदार्थलाई रोजगारमूलक संस्था तथा देशकै क वर्गको कर प्रदायक कम्पनी बनाइने बताए ।
प्रालिका अध्यक्ष लक्ष्मण न्यौपानेले २०५४ सालमा टीकापुरबाट व्यवसाय सुरु गरेको सिदार्थ ग्रुपले देशभर १६ वटा होटल रेस्टुरेन्ट सञ्चालन गरिरहेको जानकारी दिए । फुड एन्ड फनमा सिद्धार्थका खानाको विशेषताबारे जानकारी गराइने बताए ।
सिद्धार्थ बिजनेस ग्रुपअन्तर्गत नेपालगन्जमा सिद्धार्थ कटेजका साथै काठमाडौंको पुरानो बानेश्वरमा सिद्धार्थ फुडल्यान्ड, तीनकुनेमा सिद्धार्थ कटेज, सुन्धारामा होटल सिद्धार्थ र तीनकुनेमा सिद्धार्थ स्विट एन्ड बेकरी सञ्चालनमा छन् ।
त्यस्तै ललितपुरको धोवीघाटमा सिद्धार्थ कटेज, चितवनको चुम्लिङटारमा सिद्धार्थ रिभर साइड रिसोर्ट, रुपन्देहीको बुटवलमा सिद्धार्थ होटल र सिद्धार्थ कटेज रेस्टुरेन्ट, सुर्खेतको विरेन्द्रनगरमा सिद्धार्थ सनी रिसोर्ट, कैलाली चिसापानीमा सिद्धार्थ रिसोर्ट र टीकापुरमा होटल सिद्धार्थ सञ्चालनमा छन् ।
यसैबीच सिद्धार्थ कटेज रेस्टुरेन्टले मूल्य सूचिमा भ्याटलागयतका शुल्क समायोजन गरिएकाले शुक्रबारबाट कुनै अतिरिक्त शुल्क नजोड्ने घोषणा गरेको छ ।
प्रतिक्रिया दिनुहोस !
