काठमाडौ: चार साताअघि प्रधानमन्त्रीको विशेषदूतका रूपमा चीनको चारदिने भ्रमण गरी फर्केका उपप्रधान तथा अर्थमन्त्री कृष्णबहादुर महरा फेरि उत्तरी छिमेकीको यात्रामा निस्केका छन् ।
शनिबार त्यसतर्फ प्रस्थान गरेका उपप्रधानमन्त्री महराले शनिबार नै चीनको स्वशासित क्षेत्र तिब्बतका एक उच्च नेतासँग भेट गरेका छन् । तिब्बतस्थित चिनियाँ कम्युनिस्ट पार्टीका नवनियुक्त पार्टी सेक्रेटरी वु यिङ्जेइसँग उपप्रधानमन्त्री महराले भेटेका हुन् । उनले चिनियाँ नेतासँग करिब २० मिनेट भेटेका हुन् ।
चिनियाँ राष्ट्रपति सी जिनपिङको अक्टोबर महिनामा हुने भनिएको बहुप्रतीक्षित नेपाल भ्रमण स्थगित भएलगत्तै महरा चीन पुगेका हुन् ।
उपप्रधानमन्त्री महरा शनिबार तिब्बतमै शुरु भएको 'चीन-तिब्बत टुरिजम तथा कल्चर एक्स्पो' को उद्घाटनमा समेत सहभागी भए । उनी आइतबार नै स्वदेश फर्कने कार्यक्रम छ । तिब्बतमा उनलाई विशिष्ट अतिथिको रूपमा सम्मान गरिएको छ ।
उनको भ्रमण कार्यक्रमबारे सरकारले केही सार्वजनिक गरेको थिएन । तिब्बतमा उनले गरेका भेटवार्ताबारे पनि सरकारले केही बताएको छैन ।
प्रतिक्रिया दिनुहोस !
