वाइडबडी किन्न अर्थ जमानी

काठमाडौं: राष्ट्रिय ध्वाजाबाहक नेपाल वायुसेवा निगमले खरिद गर्न लागेको लामो दूरीमा सञ्चालन हुने ठूलो जहाज (वाइडबडी) खरिदमा अर्थ मन्त्रालय जमानी बस्न सहमत भएको छ । वायुसेवा निगमका लागि नेपालबाट सीधै युरोप र अमेरिकासम्मको उडान गर्न सक्ने क्षमताको वाइडबडी जहाज किन्न जमानी बस्न अर्थ मन्त्रालय सहमत भएको हो ।

अर्थले आइतबार सहमति दिएपछि अब जहाज खरिद प्रक्रिया मन्त्रिपरिषद् पुग्ने भएको छ । सरकारले स्वीकृति दिएपछि निगमले सार्वजनिक खरिदको प्रस्ताव आह्वान गर्ने भएको छ ।

नेपाल वायुसेवा निगमले आइतबार पर्यटन र अर्थ मन्त्रालयका मन्त्री र सचिवलाई राखेर गरेको एक प्रस्तुतीकरण पश्चात अर्थले आवश्यक प्रक्रिया अगाडि बढाउन सहमति दिएको निगमका महाप्रबन्धक सुगतरत्न कंसाकारले जानकारी दिए । उनका अनुसार दुईवटा जहाज किन्न अर्थ मन्त्रालय जमानी बस्नुपर्छ । यसका निम्त अर्थ तयार भएको छ । अब अर्थको सहमतिपश्चात मन्त्रिपरिषद्बाट अनुमति पाउनुपर्छ ।

निगमले पहिलोपटक अन्तर्राष्ट्रिय उडानमा वाइडबडी जहाज खरिद गर्न लागेको छ । यो जहाज खरिद गर्न निगमले पैसाको जोहोका लागि अर्थको अनुमति मागेको थियो । अर्थले सहमति दिए पनि निगमले जहाज खरिद प्रक्रिया अगाडि बढाउने भएको छ । निगमको जहाज खरिद गर्न कर्मचारी सञ्चय कोष र नागरिक लगानी कोषले लगानी गर्ने इच्छा देखाएको पनि कंसाकारले बताए ।

निगमले खरिद गर्ने जहाजको व्यापारिक योजना योजना मागेकोले प्रस्तुतीकरणबाटै स्पष्ट पारेको र आइतबारै अर्थमन्त्री कृष्णबहादुर महराले सहमित दिएको जानकारी पनि कंसाकारले दिए ।

निगमले एक दशकदेखि अगाडि सारेको वाइडबडी जहाज खरिद योजना आगामी १८ महिनाभित्रै पूरा गर्ने गरी योजना अगाडि सारेको छ । निगमले आगामी २०७४ असोजसम्मा पहिलो र चैतसम्ममा दोस्रो जहाज ल्याउने गरी योजना तयार पारेको पनि निगमको भनाइ छ ।

निगमले एयरबस कम्पनीको दुई सय ५० सिटभन्दा ठूला वाइडबडी जहाज खरिदका लागि २५ अर्ब रुपैयाँ आवश्यक रहेको व्यापारिक योजनासहितको प्रतिवदेन सरकारलाई बुझाएको छ । सरकारले स्वीकृति दिएको १८ महिना भित्रमै दुईवटा वाइबडी ल्याउने दाबी कंसाकारको छ ।

निगमले दुई वाइडबडी खरिद गरेमा १७ प्रतिशत बजार हिस्सा पु‌र्‌याउने व्यावसायिक योजना तयार पारेको छ । हाल निगमको बजार हिस्सा वार्षिक आठ प्रतिशत मात्रै छ । वायुसेवा निगमले सन् २००८ पछि पर्यटन मन्त्रालय हुँदै सरकारलाई बुझाउन थालेको थियो ।

निगमले कंसाकारकै समयमा २०६५ सालमा नै वाइडबडी जहाजको खरिद प्रक्रिया अगाडि बढाएको थियो । फेरि कंसाकारले नै जिम्मेवारी सम्हालेका बेला पुनः यो प्रस्ताव अगाडि सरेको छ । निगम स्थापना भएको ५८ वर्ष भइसके पनि हाल अन्तर्राष्ट्रिय उडानमा जम्मा तीनवटा जहाजमात्रै बनाउन सकेको छ ।