कक्षामा केटीहरु वेहोश हुन थालेपछि
खोटाङः खोटाङस्थित शारदा माबि हौंचुरका विद्यार्थीहरुमा मास हिस्टेरिया देखा परेपछि पठनपाठन प्रभावित भएको छ ।
विद्यालयमा अध्ययनरत छात्राहरुमा मास हिस्टेरियाका कारण बेहोस भएर ढल्ने, रुने, कराउने, जथाभावी दौडने, चिच्याउने लगायतका लक्षण देखिएपछि बिद्यालयको पठनपाठन प्रभावित भएको हो ।
कक्षा–६ देखि माथिका छात्रा विद्यार्थीमा महिना दिनअघिदेखि उक्त लक्षण देखिएको विद्यालयका प्रधानाध्यापक रामकुमार बरुवालले जानकारी दिए । कक्षा–१० मा अध्ययनरत सविना बरुवाल र रक्षा कार्कीबाट शुरु भएकोमा हाल दैनिक १२ देखि १५ जना छात्रामा त्यस्तो समस्या देखिन्छ ।
छात्रा विद्यार्थी बिरामी भएपछि महिना दिनदेखि पठनपाठनमा समस्या भएको विद्यालय परिवारले जनाएको छ । विद्यार्थीमा देखिएको लक्षणका बारेमा स्वास्थ्य उपचार गराउँदा समेत समाधान नभएको शिक्षकहरुले बताएका छन् ।
विद्यालयमा अध्ययन गर्ने छात्रा विद्यार्थीमा यसअघि वि.सं. २०६०/०६१ मा पनि सोही किसिमको लक्षण देखिएको विद्यालय परिवारले जनाएको छ । उस बेला छात्रा विद्यार्थीमा देखिएको लक्षण केही महिनापछि आफै नियन्त्रणमा आएको थियो ।
शारदा मावि हौंचुरमा अध्ययनरत छात्रा विद्यार्थीमा देखिएको लक्षण ‘मास हिस्टेरिया’ भएको जिल्ला अस्पताल खोटाङका प्रमुख चिकित्सक रामबहादुर केसीले बताए । डाक्टर केसीका अनुसार त्यस्तो बिरामीलाई परामर्शको आवश्यकक्ता पर्दछ ।
सामाजिक परामर्शकर्ताबाट परामर्श पाएपछि बिस्तारै ठीक हुँदै जाने केसीको भनाई छ । यसअघि जिल्लाको खार्मी, विजयखर्क, बाक्सिला लगायत गाविसका विद्यालयमा अध्ययनरत विद्यार्थीमा समेत यस प्रकारको लक्षण देखिएको थियो ।
उक्त विद्यालयहरुमा देखिएको समस्या केही समयपछि नियन्त्रणमा आएको शिक्षकहरुले बताएका छन् ।
प्रतिक्रिया दिनुहोस !
