आयल निगमको भण्डारण क्षमता बढाउन माग

धनगढीः नेपाल आयल निगम सुदूरपश्चिम क्षेत्रीय कार्यालय धनगढीको भण्डारण क्षमता बढाउन सरोकारवालाले माग गरेका छन् । ३० वर्षअघिको भण्डारण क्षमताले डिजेल पाँच दिन र पेट्रोलको एक दिनको मौज्दात पनि नहुने भएकाले भण्डारण क्षमता बढाउन माग गरिएको हो ।

धनगढीको पेट्रोलियम डिलर्स एसोसिएसनले आपूर्तिमन्त्री दीपक बोहरालाई भण्डारण बढाउन र ढुवानी साधन थप्न माग गरेको हो । धनगढीमा झन्डै ३० वर्षअघि २०४२ सालको खपतका आधारमा भण्डारण क्षमता तोकिएको थियो ।

२०३९ सालमा धनगढीमा स्थापना भएको आयल निगमको क्षेत्रीय कार्यालयमा २०४२ सालको भण्डारण क्षमता भएकाले हप्तामा दुई तीन दिन बजारमा इन्धन अभाव हुँदै आएको छ ।

सरकारले भण्डारण क्षमता पनि नबढाएको र ढुवानीका साधनमा पनि सिन्डिकेट लादेकाले हप्तामा एक दुई दिन इन्धन अभाव हुँदै आएको पेट्रोलियम डिलर्स एसोसिएसन कैलालीका अध्यक्ष देवबहादुर खत्रीले बताए ।

धनगढीमा डिजेलको भण्डारण क्षमता १५ लाख ९० हजार लिटर छ । डिजेलको दैनिक खपत तीन लाख लिटर छ । अझ दैनिक खपत ६० हजार लिटर रहेको पेट्रोलको भण्डारण क्षमता त ७० हजार लिटरमात्रै छ । ‘सरकारले ३० वर्षदेखि सुदूरपश्चिमको भण्डारण क्षमतामा ध्यान नै दिएको पाइँदैन', खत्रीले गुनासो गरे ।

२०४२ सालमा सुदूरपश्चिमभरि एक हजारको हाराहारीमा सवारीसाधन रहेकोमा अहिले त्यो संख्या बढेर एक लाख नाघेको छ । सेती अञ्चल यातायात व्यवस्था कार्यालय धनगढीको तथ्यांकअनुसार सेती अञ्चलका पाँच जिल्लामा मात्रै ६५ हजारभन्दा बढी सवारीसाधन छन् ।

आयल निगमको मौज्दात क्षमता इन्धन अभावको पहिलो कारण हो भने अर्को कारण ढुवानीका ट्यांकरमा लगाइएको सिन्डकेट रहेको पेट्रोलियम डिलर्स एसोसिएसनले जनाएको छ ।

‘सेतीमा मात्रै ६५ हजारभन्दा बढी सवारीसाधन छन्, अझ बाहिरबाट आउने सवारीसाधनलाई इन्धन दिन्न भन्न त मिल्दैन, त्यसले पनि खपत बढाउँछ', सेती अञ्चल यातायात व्यवस्था कार्यालयका प्रमुख कृष्णप्रसाद भुसालले भने ।

महाकाली अञ्चल यातायात व्यवस्था कार्यालयमा ५० हजारभन्दा बढी सवारीसाधन दर्ता भएका छन् । ‘त्यसैले पनि अहिलेको मौज्दात नगन्य भएकाले इन्धनको हप्तामा दुई तीन दिन अभाव भइरहन्छ', सुदूरपश्चिम यातायात व्यवसायी संघका अध्यक्ष टेकराज जोशीले भने ।

आयल निगमको मौज्दात क्षमता इन्धन अभावको पहिलो कारण हो भने अर्को कारण ढुवानीका ट्यांकरमा लगाइएको सिन्डकेट रहेको पेट्रोलियम डिलर्स एसोसिएसनले जनाएको छ । सुदूरपश्चिमका लागि पेट्रोलियम ढुवानी गर्न अहिले ६६ वटा ट्यांकरमात्रै छन् ।

‘भारतको नाकाबन्दीका बेला पनि यो नाका सहज रहेकोमा ट्यांकरको कमी भएकाले ढुवानी हुन सकेको थिएन', एसोसिएसनका अध्यक्ष खत्रीले भने । धनगढीमा रहेको ट्यांकर व्यवसायी संघले पाँच वर्षदेखि नयाँ ट्यांकर थप्न दिएको छैन ।

‘ट्यांकरको सिन्डिकेट पनि बजारमा अभाव हुनुको महत्वपूर्ण कारण हो', उपभोक्ता हित संरक्षण मञ्च कैलालीका अध्यक्ष धनपति ढुंगेलले भने । ‘निगमले भण्डारण क्षमता नबढाउँदा र ट्यांकर नथप्दासम्म बजारमा सहज आपूर्ति हुँदैन ।'

धनगढीका लागि भारतको उत्तरप्रदेशमा रहेको बन्थरा डिपोबाट इन्धन आयात गरिन्छ तर भारतले शनिबार र आइतबार इन्धन लोड दिँदैन । यसले पनि आपूर्तिमा समस्या खडा गरेको छ ।