नेपालले जमकालाई हरायो

काठमाडौं: अजरबैजानमा जारी ४२ औं चेस ओलम्पियाडको नवौं चरणको खेलमा सोमबार नेपालको पुरुष टोलीले जमैकालाई निकै रोचक भिडन्तबीच २.५—१.५ ले पराजित गरेको छ । नेपाल १२७ औं र जमैका ११५ औं स्थानमा रहेका टोली हुन् । नेपाल पाकिस्तान, श्रीलंका, दक्षिणी कोरियालगायत ३४ वटा राष्ट्र रहेको ‘डी’ समूहमा नौ अंकसहित दोस्रो स्थानमा छ ।

दसौं चरणको खेलमा चाइनिज ताइपेईलाई पराजित गरेमा नेपालको पुरुष टोलीले पदक हात पार्ने निश्चित छ । महिला टोलीले पाकिस्तानसँग २—२ को बराबरी खेल्दै अंक बाँड्यो । महिला टोलीको पाँच अंक छ । पुरुषतर्फ नवौं चरणको खेलमा विलमलाल श्रेष्ठ र क्षितिज भण्डारीले जित हात पारे । पहिलो बोर्डमा २०९९ रेटेड केशव श्रेष्ठले २२३८ रेटेड इलियट वारेनसँग बराबरी खेले ।

यसैगरी २०३४ रेटेड सजिन महर्जन २११७ रेटेड डेमन डेभवर्टसँग पराजित भए । आठौं चरणको खेलमा इन्टरनेसनल मास्टर (आईएम) लाई पराजित गरेका २०१३ रेटेड क्षितिजले तेस्रो बोर्डमा खेलेर २१६१ रेटेड र्मोर्ने मलाकुलाई हराए । क्षितिजले यो जितसँगै क्यान्डिडेट मास्टर (सीएम) को उपाधि पनि हात पारेका छन् । चौथो बोर्डमा २०१७ रेटेड विलमले २०७४ रेटेड विल्सन ब्रन्डनलाई हराए । विलमको यो आठ खेलमा छैटौं जित हो । प्रतियोगितामा उनको व्यक्तिगत अंक सात पुगेको छ । नेपालको पुरुष टोलीले १० औं चरणको खेलमा चाइजिज ताइपेईसँग प्रतिस्पर्धा गर्नेछ ।

महिला स्पर्धामा भने नेपाली टोलीले पाकिस्तानसँग बराबरी खेल्यो । नेपालकी सिन्दिरा जोशी र सुजना लोहनीले जित हात पारे । अस्मिता अधिकारी र शान्ता थापा भने पराजित भए । सुजनाको सात खेलमा यो पाँचौं जित हो । उनी दुई खेल बाँकी रहँदा नेपालको पहिलो डब्लूएफ उपाधि हात पार्ने खेलाडी बन्नबाट केवल एक अंक टाढा छिन् । नेपालको महिला टोलीले १० औं चरणको खेलमा लेसेथोको सामना गर्नेछ ।