न्युडायमन्ड र एपीएफको विजयी सुरुआत
काठमाडौः न्युडायमन्ड स्कुल र एपीएफ क्लबले तेस्रो एनभीए राष्ट्रिय महिला तथा पुरुष क्लब भलिबल च्याम्पियनसिपअन्तर्गत महिलातर्फ विजयी सुरुवात गरेका छन् । मंगलबारबाट त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सुरु भएको प्रतियोगिताको उद्घाटन खेलमा विभागीय टोली त्रिभुवन आर्मी क्लबलाई पराजित गर्दै न्युडायमन्डले विजयी सुरुवात गरेको हो । यस्तै एपीएफले काभ्रे जिल्ला भलिबल संघलाई पराजित गर्यो ।
न्युडायमन्डले आर्मीलाई २५-११, २५-१४, २५-१६ को सोझो सेटमा पराजित गर्दा एपीएफले पनि काभ्रेलाई २५-५, २५-८, २५-३ को सोझो सेटमै पराजित गरेको हो । पुरुषतर्फको खेलमा रूपन्देहीको मणिमुकुन्द भलिबल क्लब र ढोरपाटन स्पोर्टस् ट्रेनिङ सेन्टरले विजयी सुरुवात गरेका छन् ।
राखेप कभर्डहलमै भएको खेलमा मणिमुकुन्दले काभ्रे भलिबल संघमाथि २५-१२, २५-१७, २५-१८ को जित निकाल्यो । यस्तै ढोरपाटनले बूढानीलकण्ठ भलिबल संघलाई १६-२५, २५-२३, २५-१४, २७-२५ ले पराजित गर्दै विजयी सुरुवात गर्यो ।
लिगकम नकआउटका आधारमा सञ्चालन भइरहेको प्रतियोगितामा पुरुषतर्फ १२ टोली र महिलातर्फ ९ टोलीको सहभागिता रहेको छ । च्याम्पियनसिपको पुरुष र महिलातर्फका विजेताले समान एक लाख ५० हजार प्राप्त गर्ने छन् ।
त्यस्तै उपविजेताले ७० हजार पाउने छन् । दुवै विधाका सर्वोकृष्ट खेलाडीले समान १५/१५ हजार प्राप्त गर्ने छन् । व्यक्तिगत विधातर्फका उत्कृष्ट स्पाइकर, ब्लकर, लिफ्टर, लिब्रो र सर्भरले पनि जनही पाँचपाँच हजार पाउने आयोजक भलिबल संघले जनाएको छ । प्रतियोगिताको युवा तथा खेलकुदमन्त्री दलजित श्रीपाइलीले उद्घाटन गरेका थिए ।
भलिबल संघ विस्तार
पूर्व राष्ट्रिय खेलाडी रञ्जन खड्कालाई नेपाल भलिबल संघको उपाध्यक्षमा मनोनीत गरिएको छ । यस्तै पूर्व राष्ट्रिय खेलाडी भरतबहादुर शाह, टेककुमार राजभण्डारी, रोशन श्रेष्ठ, विक्रम बोगटी, झकबहादुर मि श्र र जितेन्द्र श्रेष्ठ सदस्यमा मनोनीत भएका छन् ।
त्यसैगरी पूर्व अध्यक्ष गंगाबहादुर थापासहित रमेशमान मल्ल र रामचन्द्र भण्डारी संघको सल्लाहकारमा मनोनीत भएका छन् । मनोनीत सल्लाहकार तथा पदाधिकारीलाई भलिबल संघका अध्यक्ष मनोरञ्जनरमण शर्माले मंगलबार शपथग्रहण गराएका थिए ।
प्रतिक्रिया दिनुहोस !
