काठमाडौंः नेकपा माओवादी केन्द्रले भारत भ्रमणका क्रममा देश र जनताको हितका पक्षमा मात्रै सहमति गर्न प्रधानमन्त्री पुष्पकमल दाहाल प्रचण्डलाई सुझाव दिएको छ ।
प्रधानमन्त्री दाहालको निजी निवास लाजिम्पाटमा बुधबार बसेको माओवादी केन्द्रको केन्द्रीय कार्यलयको बैठकमा पार्टी अध्यक्ष समेत रहेका प्रचण्डले आफ्नो भारत भ्रमणको कार्यतालिका र कार्यसूचिका विषयमा जानकारी गराएको पार्टी प्रवक्ता पम्फा भुसालले जानकारी दिइन् ।
बैठकमा पार्टीका नेताले प्रधानमन्त्रीलाई भारत भ्रमणको सफलताको लागि शुभकामना दिँदै दुई देशको सम्बन्ध सुदृढ गर्न र नेपालको राष्ट्रिय हित हुने गरी कार्यसूची तय गर्न सुझाव दिएको प्रवक्ता भुसालले बताइन् ।
प्रधानमन्त्रीले यो भ्रमण मुख्य त सद्भाव भ्रमण भएको प्रधानमन्त्री प्रचण्डले नेपाल र भारतका बीचमा भएका सहमति, समझदारी कार्यान्वयन गर्नेमा आफू केन्द्रित हुने जानकारी गराएका थिए ।
भ्रमणमा भूकम्पपछिको पुनःनिर्माणका लागि भारतीय सहयोग, हुलाकी राजमार्ग निर्माण, विद्युत् व्यापार सम्झौताको कार्यान्वयनलगायत विषयलाई आफूले प्राथमिकतामा राखेको प्रधानमन्त्रीले बैठकमा जानकारी गराएको प्रवक्ता भुसालले बताइन् ।
प्रतिक्रिया दिनुहोस !
