झापामा ११ स्थानीय तह हुने

विर्तामोडः राप्रपा नेपाल बाहेकका राजनीतिक दलले झापामा ११ वटा स्थानीय तह बनाउन सहमति गरेका छन् । झापाका राजनीतिक दलले जिल्लामा एउटा उप महानगरपालिका, ७ नगरपालिका र ३ वटा गाउँपालिका बनाउने सहमति गरेका हुन् ।

स्थानीय तहको पुनरसंरचनाका लागि दलले अहिलेको मेचीनगर नगरपालिकामा बाहुनडाँगी, ज्यामिरगढी, धाइजन, दुहागढी र शान्तिनगर गाविसलाई मिसाएर मेची उपमहानगरपालिका बनाउने सहमति गरेका छन् ।

बिर्तामोडमा गरामनीलाई मिसाएर वीरता नगरपालिका, भद्रपुरमा पृथ्वीनगर, जलथल र हल्दिबारीलाई मिसाएर भद्रपुर नगरपालिका, शनिअर्जुन नगरपालिकामा बुधबारे र खुदुनाबारी गाविसलाई मिसाएर अर्जुनधारा नगरपालिका बनाउने सहमति भएको छ ।

दमकमा लखनपुरलाई मिसाएर दमक नगरपालिका, गौरादहमा खजुरगाछी र गौरीगञ्जलाई मिसाएर गौरादह नगरपालिका, शिवसताक्षीमा धरमपुर र पाँचगाछीलाई मिसाएर शिवसताक्षी नगरपालिका र कन्काईमा शरणामति, टाँघनडुब्बा र कुमरखोदलाई मिसाएर कन्काई नगरपालिका बनाउने सहमति भएको छ ।

डाँगीबारी, चकचकी, गोलधाप र राजगढलाई मिलाएर बाह्रदशी गाउँपालिका, घेराबारी, पथरिया, बालुबारी, केचना, पाठामारी र बनियानीलाई मिलाएर कचनकवल गाउँपालिका तथा तोपगाछी, बैगुनधुरा, महाभारा र कोरोबारीलाई मिलाएर कमल गाउँपालिका बनाइने भएको छ ।

नेपाली कांग्रेस, एमाले, माओवादी केन्द्र लगायतका दलहरुले सहमति गरेको त्यस प्रस्तावित संरचनामा राप्रपा नेपाल भने असहमत देखिएको छ । स्थानीय निकाय पुनःसंरचना आयोगले १० वटा स्थानीय तह निर्धारण गर्न भनेकोमा त्यसलाई बढाइएको भन्दै आफ्नो पार्टीले असहमति जनाएको राप्रपा नेपालका जिल्ला अध्यक्ष अम्बर बिष्टले बताए । दमकलाई चलाउन नहुने, बिर्तामोडमा गोलधाप, गरामनी र हल्दिबारीलाई गाभेर उपमहानगरपालिका बनाइनुपर्ने, स्थानीय तहको नाम परिवर्तन गर्न नहुने जस्ता माग राख्दै असहमति जनाएको उनले बताए ।