पाकिस्तानविरुद्  राष्ट्रसंघमा बलुचको प्रदर्शन

न्युयोर्कः पकिस्तानको बलुचिस्तानका नागरिकको एक समूहले संयुक्त राष्ट्रसंघको मुख्यालय बाहिर पाकिस्तानका विरोधमा प्रदर्शन गरेका छन् । बलुचिस्तानमा अत्याचार गरेको भन्दै त्यसको विरोधमा नारा लगाएका हुन् ।

बलुच कार्यकर्ताले पाकिस्तानबाट स्वतन्त्र हुन पाउनुपर्ने भन्दै नारा लगाएका छन् । उक्त विरोध प्रदर्शन फ्री बलुचिस्तान मुभमेन्ट (एफबिएम)ले आयोजना गरेको थियो । राष्ट्रसंघको मुख्यालय बाहिर सडकमा उनीहरूले प्रदर्शन गरे ।

राष्ट्रसंघको एकहत्तरौं महासभाको सुरु पारेर यस्तो प्रदर्शन गरिएको हो । बलुच विद्रोहीले संयुक्त राज्य अमेरिका र बलुचिस्तानका झण्डा पहराउँदै विरोध गरेका थिए । उनीहरूले ‘बलुचिस्तानमा मानवअधिकार उल्लंघन बँद गर’, ‘बलुचिस्तानमा बम आक्रमण बन्द गर’, ‘बलुचिस्तान पाकिस्तान होइन’ लेखिएका ब्यानर बोकेका थिए । उनीहरूले रगतले लतपतिएका खेलौना प्रदर्शन गरेका थिए ।

त्यहाँ रहेका रगतले लतपतिएका खेलौना बलुच बालबालिका भएको उनीहरूको भनाइ थियो । बलुच बालबालिकाको भविष्यमा रक्तपात भइरहेको भन्दै ‘बलुच बालबालिकालाई बचाऊ’ लेखिएको थियो ।

केही प्रदर्शनकारीले सेतो टिसर्टमा कालो रंगले ‘बलुचिस्तानमा मानवअधिकार उल्लंघन’ जस्ता नारा लेखेका थिए । उनीहरूले ‘स्वतन्त्र बलुचिस्तान’, ‘बलुच जनताको नरसंहार बन्द गर’, ‘राष्ट्रसंघ पाकिस्तानलाई आर्थिक सहयोग बन्द गर’ भन्दै उत्तेजक नारा लगाएका थिए ।

उनीहरूले पाकिस्तानी सुरक्षाकर्मीले ५ हजार बलुचको हत्या गरेको र २० हजारलाई बेपत्ता बनाएको आरोप लगाएका थिए । एफबिएमले बलुच जनतामाथि भएको अत्याचारलाई अन्तर्राष्ट्रियकरण गरेको र स्वतन्त्रता संघर्षका बारेमा जानकारी दिन यस्तो विरोध गर्नुपरेको उनीहरूको भनाइ छ ।

आफूहरूमाथि पाकिस्तानले गरेको निर्मम दमनको राष्ट्रसंघले संज्ञान लिनुपर्ने माग गरे । पाकिस्तानले सन् १९४८ मा बलुचिस्तानमा कब्जा गरेको उनीहरूको भनाइ छ । त्यतिखेरदेखि नै बलुचिस्तानमा मानवअधिकार उल्लंघन भइरहेको उनीहरूले दाबी गरे । पाकिस्तान सरकारले निर्दोष बलुचको हत्या गरेर जीवन नारकीय बनाएको उनीहरूले बताए ।

उनीहरूले राष्ट्रसंघको महासभालाई लक्षित गरेर यस्ता विरोधलाई तीव्रता दिएका छन् । एक सातापछि विभिन्न देशका राष्ट्रप्रमुख र सरकार प्रमुख महासभामा सहभागी हुँदै छन् । पाकिस्तानका प्रधानमन्त्री नवाज सरिफले सेप्टेम्बर २१ तारिखमा राष्ट्रसंघको महासभालाई सम्बोधन गर्ने कार्यक्रम छ ।

संयुक्त राज्य अमेरिकाले भने बलुच स्वतन्त्रतालाई समर्थन नगर्ने मंगलबार स्पष्ट पारेको छ । आफू जहिले पनि अखण्ड पाकिस्तानको पक्षमा रहेको उसको भनाइ छ । पाकिस्तानको एकता, क्षेत्रीय अखण्डताको सदैव सम्मान गर्ने अमेरिकी भनाइ छ ।

अमेरिकी विदेश मन्त्रालयका प्रवक्ता जोन किर्बीले अमेरिकाले पाकिस्तानको बलुचमा स्वतन्त्रताको माग गर्नेहरूलाई सहयोग नगर्ने स्पष्ट पारेका छन् । बलुच प्रान्तमा बेग्लै राज्यको माग गरी भइरहेका प्रदर्शनका बारेमा अमेरिकी धारणाका बारेमा सञ्चारकर्मीले उनलाई प्रश्न गरेका थिए ।

बम आक्रमणमा २ को मृत्यु

पाकिस्तानको अशान्त बलुचिस्तान प्रान्तमा सडक किनारमा राखिएको बम विस्फोट हुँदा २ जना प्रहरीको मृत्यु भएको छ । यसैगरी सिन्ध प्रान्तमा इद–उल–अजहाको बेला नमाज पाठ गर्न जम्मा भएका अल्पसंख्यक सियालाई लक्षित गरी गराइएको विस्फोटमा २३ जना गमभीर घाइते भएका छन् । घाइतेहरूको स्थानीय अस्पतालमा उपचार भइरहेको छ । उक्त विस्फोटको कसैले जिम्मा लिएको छैन ।