नेपाली चलचित्र क्षेत्रमा पहिलो महिला निर्देशकको परिचय बनाइसकेकी निर्देशक सुचित्रा श्रेष्ठ हालै चलचित्र निर्देशक समाजको पहिलो महिला अध्यक्षमा विजयी भइन् । अन्तर्राष्ट्रिय स्तरमा नेपाली चलचित्रलाई चिनाउन प्रयासरत उनी चाँडै नै हिन्दी चलचित्र 'चक्र' को निर्देशन गर्ने भएकी छन् ।
जुन विषयले चर्चा पाएको छ । २०५८ सालमा चलचित्र 'प्रेमयुद्ध'बाट निर्देशनमा लागेकी सुचित्राले यस अगाडि नेपाल टेलिभिजनबाट प्रसारित सिरियल 'अकल्पित र स्मृति'को मुख्य सहायक निर्देशकको भूमिका निभाएकी थिइन । उनले 'सहारा', 'समर्पण' र 'भाइटीका'को निर्देशन र लेखन गरिन् । योङ एसिया टेलिभिजनले बनाएको एक वृत्तचित्र निर्देशन गरेकी सुचित्रा पत्रकारितामा लामो समयदेखि आबद्ध छन् ।
रेडियो सगरमाथाबाट प्रसारण हुने 'हालचाल' कार्यक्रमको नामकरणदेखि संलग्न सुचित्राले सातामा पाँचवटा साप्ताहिकसम्ममा काम गरिन् । तीन वर्षदेखि उनी देउराली डट कममा सम्पादकका रूपमा कार्यरत छिन् । बहुआयामिक सुचित्रा श्रेष्ठसँग अन्नपूर्णकर्मी रामकला खड्काले गरेको कुराकानी ।
हिन्दी चलचित्र निर्देशन गर्ने सोच कसरी आयो ?
पाँच वर्षअगाडि यसको कुराकानी भइरहेको थियो । अहिले यो अवसर मिल्यो । लभ र एक्सन चलचित्र 'चक्र' को म र बलिउडका निर्देशक राजेश राजले निर्देशन गर्ने छौं ।
चलचित्रको छायांकन कहिले र कहाँ हुन्छ ?
बिहारका व्यापारी शंकर दास र अनवर राजले निर्माण गर्ने उक्त चलचित्रको तिहार पछाडिबाट छायांकन सुरु गरिनेछ । यसको छायांकन ७५ प्रतिशत बिहारको झारखण्डमा भए पनि २५ प्रतिशत भने नेपालमै हुने तय भएको छ । कलाकार पनि उता र यताको मिलाएर राख्ने सोच छ ।
चलचित्र निर्देशक समाजमा आइसकेपछि कस्ता चुनौती देख्नुभएको छ ?
मलाई यहाँसम्म आइपुग्न नै ठूलो चुनौती पार गर्नुपर्यो । मेरा अग्रजमध्ये पनि कतिले साथ दिए कतिले दिएनन् । तर अब यहाँ आइसकेपछि म एक्लो छैन । समाजको सिंगो टिम नै सक्षम र जागरुक भएकाले हामी सबै मिलेर अगाडि बढ्ने सोच राखेका छौं । चलचित्र विकास बोर्डसँग पनि सहकार्य गरेर हामी अगाडि बढ्नेछौं ।
समाजमा आएपछि तपाईंले प्राथमिकतामा राखेका कामहरू के हुन् ?
पहिले त यहाँभित्रको व्यवस्थालाई मिलाउन केही समय लाग्छ । त्यसपछि आर्थिक उन्नतिका लागि कसरी अगाडि बढ्ने भन्नेमा हामी लागिपर्नेछौं । नेपाल बाहिरका केही कार्यक्रमको पनि सोच बनाइरहेका छौं ।
नेपाली चलचित्र निर्देशकका हक अधिकारको लागि के गर्नुहुन्छ ?
नेपाली चलचित्र उद्योगमा काम गरेर पनि पारिश्रमिक नपाउने निर्देशक धेरै छन् । कामअनुसारको पारि श्रमिकका लागि पहल गर्नेछौं । दुर्घटनामा पर्दा उनीहरूका लागि क्षतिपूर्तिको माग गरिदिने, कोही बिरामी पर्दा सरकार र व्यक्तिगत तवरबाट सहयोग जुटाइदिने काम पनि गर्छौं । चलचित्रलाई अन्तर्राष्ट्रिय स्तरमा कसरी पुर्याउन सकिन्छ भन्नेमा पनि हाम्रो पहलकदमी हुनेछ ।
नेपाली चलचित्रले विदेशी बजारमा पहुँच पुर्याउन नसक्नुमा केको कमजोरी हो ?
कुनै पनि निर्माताले निर्देशकको आड, भरोसा र विश्वासमा नै लगानी गर्ने हुन् । चलचित्र बनाउँदा निर्देशकीय पक्षको कमजोरी हुन्छ भनेर भन्नै मिल्दैन । बजार व्यवस्थापनमा कमजोरी र वितरकले उचित व्यवस्थापन नमिलाएका कारण चलचित्रले बजार लिन नसकेको हो । पुरानै कलाकार र चलचित्रकर्मीलाई प्राथमिकता दिने गरेकाले पनि विदेशी बजारमा स्थान जमाउन नसकेको हो । तर अहिले चलचित्र विकास बोर्डले यसमा कदम बढाइसकेकोले भविष्यमा सुधार हुँदै जाने आशा गरेका छौं ।
पत्रकारिता र लेखनमा कसरी तालमेल मिलाउनुभएको छ ?
पत्रकारिता र लेखनमा पनि मेरो सक्रियता घटेको छैन । कथा, गीत, लेख रचनामार्फत म पाठकमाझ आइरहन्छु । निकट भविष्यमै आफ्नै निर्माण र निर्देशनमा बनाउने चलचित्रको लागि कथा लेख्ने काममा पनि व्यस्त छु ।
प्रतिक्रिया दिनुहोस !
