तीन सातादेखि बाघ र हात्तीको आतंक
वीरगन्जः जंगल छेउमा रहेका पर्साको ग्रामीण भेगमा हात्ती र बाघले तीन सातादेखि लगातार आतंक मच्चाउँदै आएको छ । चितवन राष्ट्रिय निकुन्ज र पर्सा वन्यजन्तु आरक्षको जंगलछेउमा रहेका ठोरी, निर्मलबस्ती, शंकरसरैया, महादेवपट्टी, सेढवा र सुवर्णपुर गाविसमा बाघ र हात्तीले दैनिक धनजनको क्षति पुर्याउँदै आएको छ ।
साँझ पर्नेबित्तक्कै आरक्षको जंगलबाट दर्जनौंको संख्यामा गाउँमा छिर्ने हात्तीको बथानले स्थानीयको घर भत्काउनुका साथै खेतमा धान खाएर माडेर नष्ट पार्दै आएको छ ।
शंकरसरैया, सेढवा र महादेवपट्टीमा हात्तीले दैनिक गाउँमा पसेर रातभर उपद्रो मच्चाउँदै आएको सेढवाका स्थानीय रामेश्वर साहले बताए । जंगली हात्तीले तीन साताको अवधिमा शंकरसरैया, महादेवपट्टी, सेढवा र सुवर्णपुर गाविसमा गरी दस बिघाभन्दा बढी जग्गाको धानबाली खाएर तथा माडेर नष्ट पार्नुका साथै स्थानीयवासीको दुईवटा घर पनि भत्काइदिएको सेढवाका कृष्णमोहन साहले बताए ।
जंगली हात्तीले बिहीबार राति पनि शंकरसरैया, सेढवा र महादेवपट्टी गाविसमा रातभर उपद्रो मच्चाएको थियो । सेढवा ९ मा रहेको सेक्टर वन कार्यालय वसन्तपुरमा हात्तीले आतंक मच्चाउन थालेपछि वन कार्यालयका जमदार रामअशीष राउत कुर्मीले दुई राउन्ड हवाई फायर गरेका थिए । हवाई फायर गरेपछि हात्तीको बथान जंगलतर्फ फर्किएको थियो ।
यस्तै पर्साको ठोरीमा एक सातादेखि बाघले आतंक मच्चाएको छ । चितवन राष्ट्रिय निकुन्जको जंगलबाट दिउँसै गाउँमा छिरेर बाघले किसानको खसीबाख्रा खाइदिनुका साथै मानिसलाई घाइते बनाइदिएको छ ।
ठोरीमा एक साताको अवधिमा बाघले किसानको आठ खसीबाख्रा खाइदिएको छ । शुक्रबार मात्रै ठोरीमा बाघको आक्रमणबाट एक महिला गम्भीर घाइते भएकी छन् । ठोरी ४ की ३५ वर्षीया बसना भण्डारी बाघको आक्रमण्बाट घाइते भएकी हुन् ।
बाघले घण्डारीको छाती, पाखुरा र तिघ्रामा आक्रमण गरी घाइते बनाएको हो । उनलाई उपचारका लागि चितवनको भरतपुर लगिएको छ । निकुन्जको जंगलबाट गाउँमा पसको बाघले बिहान ११ बजेतिर आफ्नै घरको आँगनमा बसेका बेला भण्डारीलाई आक्रमण गरी घाइते बनाएको इलाका प्रहरी कार्यालय ठोरीका प्रहरी निरीक्षक प्रद्युम्न अधिकारीले बताए ।
यसअघि शुक्रबार नै बिहान पाँच बजेतिर भण्डारीको घर अगाडि रहेको खोरमा बाघले आक्रमण गरी तीनवटा खसी बाख्रा मारेको थियो । बाघले मान्छेलाई नै आक्रमण गरेर घाइते बनाएपछि ठोरीको जनजीवन आतंकीत बनेको छ ।
नेपाली सेनाको अमुवा पोस्ट्बाट क्याप्टेन शुभराज गुरुङको नेतृत्वमा सेना र प्रहरीको टोली दुईवटा हात्तीको सहयोगमा बाघ धपाउन खटिएको भए पनि उक्त बाघ शुक्रबार बेलुकीसम्म गाँउमै बसेपछि स्थानीयको जनजीवन आतंकित बनेको हो ।
निकुन्जका प्रमुख संरक्षण अधिकृत (वार्डेन) ले बाघलाई लठ्याउने सुई लगाउने प्राविधीकको टोली शनिबार बिहान मात्र ठोरीमा पुग्ने बताएको निर्मल ठोरी उपभोक्ता समितिका अध्यक्ष हरिप्रसाद खनालले जानकारी दिए ।
प्रतिक्रिया दिनुहोस !
