रोनाल्डोभन्दा मेसी उत्कृष्ट खेलाडीः पेले

काठमाडौंः अर्जेन्टिनाका लियोनल मेसी र पोर्चुगलका क्रिष्टियानो रोनाल्डो दुवै उत्कृष्ट खेलाडी हुन्, यसमा कुनै शंका छैन। तर, यी दुईमध्ये को उत्कृष्ट खेलाडी भन्नेमा भने सवैको मत एउटै छैन्।

कोही मेसीलाई विश्वकै उत्कृष्ट खेलाडी भन्छन् भने कोहीले रोनाल्डोलाई। दुईमध्ये को उत्कृष्ट खेलाडी? भन्ने बहस विश्वभर नै छ। तर, महान फुटबलर पेलेले क्रिष्टियानो रोनाल्डोभन्दा लियोनल मेसीलाई नै उत्कृष्ट खेलाडी मान्छन्। उनले मेसीलाई उत्कृष्ट खेलाडी भन्नुमा केही कारण पनि छन्। उनले भनेका छन्,‘मेसी रोनाल्डोभन्दा धेरै पूर्ण खेलाडी हुन्।’

‘मैले केही खेलाडीका नाम उल्लेख गर्न सक्छु। तर, पछिल्लो १० देखि १५ वर्षमा धेरै राम्रा खेलाडी उत्पादन भएका छन्। मलाई लाग्छ मेसी यस्तो खेलाडी हो जसले पछिल्ला वर्षमा धेरै चर्चा कमाएको छ,’पेलेले भने,‘हामीसँग धेरै राम्रा खेलाडी छन्। ति मध्ये मेसीभन्दा रोनाल्डो पछि छन्। मेसी संगठित खेलाडी हो, जसले धेरै गोल गरेको छ।’

‘क्रिष्टियानो रोनाल्डो ब्राजिलको रोनाल्डोजस्तै खेलाडी हो। ऊ राम्रो खेलाडी हो कुनै शंका छैन। तर, मेरा लागि मेसी राम्रो खेलाडी हो,’पेलेले भनेका छन्।