मोदीसँग दिल खोलेर कुरा गरेँः प्रधानमन्त्री प्रचण्ड
नयाँदिल्लीः भारत भ्रमणमा रहेका प्रधानमन्त्री पुष्पकमल दाहाल ‘प्रचण्ड’ले भारतीय समकक्षी नरेन्द्र मोदीसँग दिल खोलेर कुरा गरेको बताएका छन् ।
भारतको राजकीय भ्रमणको तेस्रो दिन शनिबार दिल्लीस्थित ताज प्यालेस होटलमा आयोजित पत्रकार सम्मेलनमा प्रधानमन्त्री प्रचण्डले भने, ‘मोदीजीसँग दिल खोलेर कुरा भएको छ, भ्रमणबाट म पूर्ण सन्तुष्ट छु ।’
प्रधानमन्त्री प्रचण्डले आफ्नो भारत भ्रमण पूर्ण रुपमा सफल भएको समेत बताएका छन् । भारत भ्रमणबारे जानकारी गराउन आयोजित पत्रकार सम्मेलनमा उत्साहित हुँदै प्रधानमन्त्री प्रचण्डले भने, ‘भ्रमण सफल भएको छ, यो भ्रमणले सन्तुष्टि दिएको छ ।’
प्रधानमन्त्री प्रचण्ड बिहीबार राजकीय भ्रमणका लागि भारत आएका हुन् । भारत भ्रमणका क्रममा प्रचण्डले भारतीय प्रधानमन्त्री मोदी, राष्ट्रपति प्रणव मुखर्जी, भारतीय विदेशमन्त्री सुष्मा स्वराजलगायत उच्च नेतृत्वसँग भेटवार्ता गरेका छन् ।
शुक्रबार समकक्षी मोदीसँगको एकल वार्तापछि नेपाल र भारतका उच्च प्रतिनिधिमण्डलका बीचमा समेत छलफल भएको थियो । उच्चप्रतिनिधि मण्डलको छलफलपछि नेपाल र भारतबीच तीन बुँदे समझदारी भएको छ ।
शुक्रबार साँझ नेपाल र भारतको संयुक्त वक्तव्य समेत सार्वजनिक भएको छ । २५ बुँदे वक्तव्यमा नेपाल र भारतबीच भएका सम्झौता कार्यान्वयन र भूकम्पपछिको पुनःनिर्माणमा भारतले सघाउने विषयले प्राथमिकता पाएका छन् ।
प्रतिक्रिया दिनुहोस !
