दसैंको मुखमा उपहार र छुटको बहार
काठमाडौः अटो व्यवसायीका लागि दसैं-तिहारको बेला महŒवपूर्ण सिजन हो । वर्षभरिमा बिक्री हुने सवारीसाधनमध्ये करिब ४० प्रतिशत यही सिजनमा बिक्री हुन्छन् ।
व्यावसायिक सिजन सुरु भएसँगै अटो व्यवसायीमा पनि भ्याइनभ्याइ देखिन्छ । व्यवसायीहरू बढीभन्दा बढी ग्राहक तान्ने ध्याउन्नमा लागेका छन् । ग्राहक आकर्षित गर्न व्यवसायी नगद छुट र उपहारको प्रतिस्पर्धामा उत्रिएका छन् ।
खासगरी दसैं–तिहार नेपालीको आम्दानी बढ्ने पर्व हुन् । यो समयमा कर्मचारीले तलबसहित बोनस पाउँछन् । उद्योगी व्यापारीको कारोबार बढेको हुन्छ । विदेशबाट रेमिट्यान्स आप्रवाह पनि यही सिजनमा उच्च हुन्छ ।
आम्दानी बढ्ने भएपछि धेरै नेपालीले आफूलाई आवश्यक वस्तु खरिद गर्न दसैं पर्खिएर बस्ने गरेको पाइन्छ । त्यसमाथि छुट र उपहारका कारण पनि मानिस किनमेलका लागि दसैं–तिहार कुर्ने गर्छन् ।
आम्दानी बढ्ने भएपछि धेरै नेपालीले आफूलाई आवश्यक वस्तु खरिद गर्न दशैं पर्खिएर बस्ने गरेको पाइन्छ ।
अटो व्यवसायीले यस वर्ष पनि ग्राहक लोभ्याउने आकर्षक उपहार र छुट अफर सार्वजनिक गरिसकेका छन् । उपहार र छुट योजना हेर्दा लाग्छ, बढी व्यापार गर्न व्यवसायीबीच तीव्र प्रतिस्पर्धा भइरहेको छ । यसको प्रत्यक्ष फाइदा उपभोक्तालाई हुने देखिन्छ । ग्राहक आकर्षित गर्न छुट र उपहारमात्र होइन, सोरुम सजाएर झकिझकाउ बनाएको पाइन्छ ।
यस्तो छ उपहार योजना
कार
टाटा कम्पनीले दसैं-तिहारमा नगद छुटसहित मोटरसाइकल, स्कुटर र युरोप टुरसम्मको अफर ल्याएको छ । टाटा बोल्ट किन्दा ५० हजार रुपैयाँ छुट पाइनेछ । त्यो सँगै ग्राहकले यामाहा एफजेडएफ मोटरसाइकल प्राप्त गर्नेछन् । टाटा जेस्ट किन्ने ग्राहकले पनि यामाहा एफजेडएफ बाइक पाउनेछन् । टियागो किन्दा यामाहा फ्यासिनो प्रदान गर्ने कम्पनीले जनाएको छ । त्यस्तै निःशुल्क एसेसरिज र चार वर्षको वारेन्टी पनि प्राप्त हुनेछ ।
भक्सवागन कार किन्दा ६ लाखसम्म छुट प्राप्त हुनेछ । त्यस्तै हात खाली नजाने उपहारमा हरेक ग्राहकले ३२ देखि ६२ इन्चसम्मको पानासोनिक टीभी जित्नेछन् । त्यस्तै बम्पर उपहारमा दुई तोला सुनको ‘बिटल’ कार जित्ने अवसर दिइएको छ ।
हुन्डाई गाडी खरिद गर्दा ६ लाख रुपैयाँसम्म नगद छुटको व्यवस्था छ । कम्पनीले एक वर्षको सवारी बिमा, सडक दस्तुर बेहोर्ने छ । लक्की ड्रमार्फत सयजनाले एक तोला सुन जित्ने अवसर प्राप्त गर्नेछन् भने बम्परमा दुईजनाले इलाइट आई ट्वान्टी र क्रेटा कार हात पार्नेछन् ।
डाटसनले पनि दसैं–तिहारमा एक लाखसम्म छुट दिने भएको छ । त्यस्तै, २५ हजार रुपैयाँबराबरको निःशुल्क एसेसरिज, तीन वर्षसम्म निःशुल्क सर्भिस सुविधा, एक वर्षको सडक दस्तुर र नामसारी खर्च पनि कम्पनीले नै बेहोर्ने भएको छ ।
फोर्डले न्यूनतम १० हजारदेखि आठ लाख रुपैयाँसम्मको छुट दिने भएको छ । स्क्र्याच कार्डमार्फत केटीएम–२०० बाइक, भेस्पा स्कुटर, सामसुङ ४२ इन्च टीभी, क्यानोन डीएसएलआर क्यामेरा, गियर घडी प्रदान गर्ने कम्पनीले जनाएको छ ।
महिन्द्रा फोर ह्विलर्सले डेढ लाखसम्म छुट दिने घोषणा गरेको छ । साथै २५ हजार रुपैयाँबराबरको निःशुल्क एसेसरिज पाइने भएको छ । रेनल्टले एक लाख २५ हजार रुपैयाँसम्म नगद छुटको घोषणा गरेको छ । साथै १० हजार रुपैयाँबराबरको निःशुल्क एसेसरिज पनि उपलब्ध गराउनेछ । मारुती सुजुकीले एकदेखि दुई लाखसम्म छुट दिने बताएको छ । ग्राहकले स्क्र्याच कार्डमार्फत १० हजारदेखि एक लाखसम्म थप नगद छुट प्राप्त गर्न सक्नेछन् ।
स्याङयोङ गाडीमा सात लाख रुपैयाँसम्मको छुट व्यवस्था छ । एक वर्षको स्वास्थ्य बिमा, गाडी बिमा, रोड ट्याक्स र दुई वर्षको सर्भिसिङ निःशुल्क हुनेछ । साथै पाँचजनाले लक्की ड्रमार्फत सामसुङ नोट सेभेन प्राप्त गर्नेछन् ।
किया गाडी किन्दा २५ हजारदेखि ६ लाख रुपैयाँसम्म छुट पाइनेछ । निसानले साढे दुई लाखदेखि पाँच लाखसम्म छुट दिने भएको छ । निसानले पनि एक वर्षको बिमा र रोड ट्याक्स पनि बेहोर्नेछ । स्कोडा खरिद गर्दा एक वर्षको निःशुल्क सर्भिसिङ, निःशुल्क एसेसरिज, रोड ट्याक्सलगायतका सुविधा प्राप्त गर्न सकिनेछ ।
होन्डा गाडी खरिद गर्दा एकदेखि तीन लाखसम्म छुट पाइनेछ । कम्पनीले एक वर्षको बिमा, रोड ट्याक्स, नामसारी पनि निःशुल्क गरिदिनेछ । फियाटले तीन वर्षसम्मको निःशुल्क सर्भिसिङ, निःशुल्क एसेसरिज, एक वर्षको रोड ट्याक्सलगायतको सुविधा दिने बताएको छ ।
बाइक
अप्रिलिया बाइकमा १४ हजारदेखि १८ हजार रुपैयाँसम्म छुट प्राप्त गर्न सकिने भएको छ । उपहार योजनामा प्रत्येक अप्रिलिया बाइकको खरिदमा तीन हजार रुपैयाँ पर्ने हेल्मेट सित्तैमा पाइन्छ ।
बजाज बाइकमा स्क्र्याचमार्फत ६ हजारदेखि एक लाखसम्म छुट प्राप्त हुनेछ । महिन्द्रा बाइक तथा स्कुटर खरिद गर्दा पनि स्क्र्याच कुपनमार्फत आठ हजारदेखि एक लाखसम्म छुट पाइने भएको छ । टीभीएस बाइक तथा स्कुटरमा सात हजारदेखि १० हजारसम्म छुटको व्यवस्था गरिएको छ ।
हिरो बाइकमा ६ हजार र स्कुटरमा आठ हजार छुटको व्यवस्था छ । हिरोले हात खाली नजाने उपहारमा स्क्र्याच कुपनमार्फत सुन र चाँदीका सिक्का दिने भएको छ । १० हप्ता चल्ने यस योजनामा हरेक हप्ता एकजना ग्राहकले एक लाख रुपैयाँ नगद प्राप्त गर्नेछन् ।
होन्डा बाइक तथा स्कुटर खरिद गर्दा पनि स्क्र्याचमार्फत चार हजारदेखि एक लाखसम्म छुट पाइनेछ । त्यस्तै २० पटक निःशुल्क सर्भिसिङ, पाँच वर्षसम्म पार्टपुर्जा खरिद गर्दा १० प्रतिशत छुटको व्यवस्था पनि छ ।
यामाहा बाइक तथा स्कुटर खरिद गर्दा ग्राहकले आठ हजारसम्म नगद छुट प्राप्त गर्नेछन् । त्यस्तै हरेक हप्ता एकजनाले चारदिनको जापान टुरको अवसर प्राप्त गर्नेछ । सुजुकी बाइक तथा स्कुटरमा स्क्र्याच कार्डमार्फत सात हजारदेखि एक लाखसम्म नगद छुटको व्यवस्था गरिएको छ । त्यस्तै एकजनाले लक्की ड्रमार्फत सुजुकी मोटोजिपी बाइक प्राप्त गर्न सक्नेछन् ।
प्रतिक्रिया दिनुहोस !
