बाैलाहा कुकुरले टोकेर दुईको मृत्यु, १५ घाइते
लिबाङः बौलाहा कुकुरले टोकेर पूर्वी रोल्पामा दुईजनाको मृत्यु भएको छ । मृत्यु हुनेमा सिर्प ५ सिमेगिठाका ६५ वर्षीय करे पुनमगर र ५३ वर्षीया हीराबहादुर पुनमगर छन् ।
सोही गाउँका श्यामे पुनमगरको घरपालुवा कुकुर बहुलाएरपछि भदौ ९ गते गाउँलेलाई टोकेको थियो । स्थानीय नेमबहादुर खड्काअनुसार एकै दिन गाउँका ६ जना महिलासहित ११ पुरुष र ६ वटा चौपायालाई टोकेको थियो । बहुला कुकुरले टोकेपछि घाइते केहीले सुलीचौर रुइनिबाङस्थित नेसनल मेडिकलमा रेबिजविरुद्ध सुई लगाएका थिए ।
बहुला कुकुरलाई गाउँलेले तत्कालै मारेका थिए । घटनाबारे प्रहरीलाई जानकारी नगराएका गाउँलेले कुकुरधनीले नै घाइतेको उपचार खर्च व्यहोर्ने निर्णय गरेका थिए । सुई लगाए पनि घाइतेको मृत्यु हुन थालेपछि गाउँले त्रसित भएका छन् । करेको मंगलबार घरमै मृत्यु भएको हो ।
घाँटीमा टोकेर घाइते भएका हीराको असोज २ गते उपचारका लागि वुटवल लैजाँदै गर्दा बाटैमा मृत्यु भएको थियो । स्तनमा टोकेर घाइते भएकी सोबी घर्ती बिरामी छिन् । गाउँलेका अनुसार कुकुरले टोकेका २ वटा गाई र २ वटा बाख्रा मरेका छन् । घाइते दुईवटा बाख्रा पनि मर्ने अवस्थामा छन् ।
बहुला कुकुरले टोकेकाहरूको मृत्यु हुन थालेपछि गाउँलेले ४५ वटा कुकुर मारेका छन् । सर्वपक्षीय भेला गरी सबैले घरमा पालिएका कुकुर मार्ने निर्णयसमेत गरेका छन् ।
घाइतेको मृत्यु हुन थालेपछि गाउँलेले जिल्ला अस्पताल रेउघा र प्राथमिक स्वास्थ्य केन्द्र सुलीचौरका स्वास्थ्यकर्मीलाई जानकारी दिएका छन् । प्राथमिक स्वास्थ्य केन्द्रका सिनियर अहेव मोटिम आलमका अनुसार घाइतेलाई री भ्याक्सिनका लागि बुधबार सुलीचौर बोलाइएको छ ।
जिल्ला स्वास्थ्य प्रमुख डा. भवानी शर्माले भ्याक्सिन सुलीचौर पठाउने र आपूm पनि जाने तयारी गरेको बताए । मेडिकल अफिसर डा.तेजेन्द्र साउदको नेतृत्वमा स्थास्थ्यकर्मीको टोली सुलीचौर पठाउने उनले जानकारी दिए ।
प्राथमिक स्वास्थ्य केन्द्र सुलीचौरका इन्चार्ज डा. मिलन बज्राचार्यका अनुसार बहुला कुकुरले टोकेको अवस्था हेरेर रेबिजविरुद्धको भ्याक्सिन सँगसँगै एन्टिबायोटिकसमेत दिनुपर्छ । जिल्ला अस्पतालमा यो सेवा भए पनि सुलीचौरमा छैन ।
प्रतिक्रिया दिनुहोस !
