झाडापखालाले गाउँ नै प्रभावित
राजविराजः सप्तरीको कोइलाडी गाविस २ मा झाडापखाला फैलिँदा गाउँ नै प्रभावित भएको छ । जिल्ला जनस्वास्थ्य कार्यालय सप्तरीका अनुसार तीन दिनदेखि फैलिएको झाडापखालाले ५० जनाभन्दा बढी बिरामी भएका छन् ।
तीन दिनअघि सामान्य रूपमा देखापरेको झाडापखाला अहिले सिंगो मण्डलबस्तीमा फैलिएको स्थानीयको भनाइ छ । झाडापखालाबाट बिरामी हुनेमा अधिकांश बालबालिका र महिला छन् । सुरुमा बान्ता हुने र पखाला लाग्ने लक्षण देखिएको सर्वसाधारणमा अहिले पेट दुख्ने समस्या थपिएको जिल्ला जनस्वास्थ्य कार्यालयले जनाएको छ ।
झाडापखाला अनियन्त्रित भएपछि सर्वसाधारणमा त्रास फैलिएको छ । बिरामीको संख्या बढ्नुका साथै रोकथाम नभएपछि बिरामी सदरमुकाम राजविराजस्थित अञ्चल अस्पतालमा भर्ना हुन थालेका छन् ।
अस्पतालमा सत्तोदेवी मण्डल र उनकी छोरी कविता, रासखियादेवी मण्डल, उनकी बुहारी फूलकुमारी र नातिनी मान्सी मण्डल, सोनीदेवी मण्डल, उनकी जेठानी रुबीदेवी र रुबीका छोरा दिलखुस मण्डल, बिनादेवी मण्डल, उनकी दुई वर्षीया छोरी सपना, नन्द दीपाकुमारी र देवर मना मण्डल भर्ना भएका छन् । अन्य चारजना बिरामी उपचारपछि डिस्चार्ज भएको डा. डिकनाथ यादवले बताए ।
सदरमुकाम राजविराज आएका गाउँलेले मंगलबार झाडापखाला अनियन्त्रित भएकाले औषधिसहित चिकित्सकको टोली पठाउन माग गरेपछि जिल्ला जनस्वास्थ्य कार्यालयको टोली औषधिसहित गाउँ पुगेको जनस्वास्थ्य निरीक्षक राजनारायण ठाकुरले बताए । स्लाइन पानीसहित आवश्यक औषधि उपलब्ध गराएको र चारजना स्वास्थ्यकर्मीलाई गाउँमै खटाइएको जनस्वास्थ्य निरीक्षक ठाकुरले बताए ।
गाउँका प्रत्येक परिवारका दुईतीनजना सदस्यमा झाडापखाला देखापरेको पीडितलाई गाउँमै स्लाइनसहित उपचार सुरु गरिएको ठाकुरले बताए । दूषित पानीका कारण झाडापखालाको प्रकोप फैलिएको आशंकामा जनस्वास्थ्यको टोलीले पानीका १२ वटा नमुना परीक्षणका लागि राजविराज ल्याएको छ ।
औषधिसहितको टोली गाउँ पुगे पनि त्यो पर्याप्त हुन नसकेको कोइलाडी २ की रामसखियादेवी मण्डलले बताइन् ।