पानीले नै बगाउन थाल्यो राजमार्ग
बिर्तामोडः असारको मध्यतिर केही दिनको वर्षाका कारण बिर्तामोड नगरपालिकाको मध्य भाग भएर बग्ने अन्दुवा खोला पसेर बिर्तामोड बजारका घर डुबानमा परे । भुईंतलामा बसोबास गर्ने सर्वसाधारणका लत्ताकपडालगायत खाद्यान्न सबै भिज्यो । धेरैको सरसामान बग्यो ।
गत मंगलबार राति परेको वर्षाका कारण बिर्तामोड बजार पूर्वपट्टि रहेको एउटा कल्भर्ट बगाउँदा पूर्वपश्चिम राजमार्ग नै अवरुद्ध भयो । राजमार्गमा बनेको कल्भर्ट बगाएपछि मुख्य राजमार्गबाट सवारी आवागमन बन्द भएको छ । पूर्वबाट पश्चिम जाने तथा पश्चिमबाट पूर्व जाने सवारी साधनलाई वैकल्पिक बाटोबाट आवागमन गराइएको छ ।
यो वर्षायममा ठूला नदीले राजमार्गमा त्यति क्षति पुर्याएनन् । जति क्षति भए साना खोला तथा पैनीमा बढेको पानी कारण भएका हुन् । बजार आसपासका खोला र पैनी स्थानीयले मास्न थालेपछि त्यहाँ बग्ने पानीले निकास नपाउँदा क्षति हुन पुगेको हो । अन्दुवा खोला बग्ने भाग मासेर मान्छेले ठूलाठूला घर बनाउन थालेपछि खोला जताततैबाट बग्न थालेको सर्वसाधारणको भनाइ छ ।
केही व्यक्तिले सहर भएर बग्ने खोला अतिक्रमण गरेर ठूल्ठूला घर बनाएपछि खोला सहर पसेको धेरैको भनाइ छ । बिर्तामोडको अन्दुवा खोला सहर पसेको उदाहरण दिँदै स्थानीयवासी याम बिमलीले भने, ‘मान्छेले खोला मिचेर घर बनाएका छन् । खोलाले निकास त पाउनुपर्यो नि । अन्दुवाको हालत पनि त्यही हो ।'
सानातिना पैनी तथा नाला व्यवस्थित गर्न स्थानीय स्वायत्त शासन ऐन २०५५ ले ढल निकासका लागि संरचना निर्माण गर्न नगरपालिकालाई निर्देशित गरेको छ । केही सहरी क्षेत्रमा यस्ता संरचना बने पनि प्रभावकारी छैनन् भन्छन् मेचीनगर नगरपालिकाका इन्जिनियर कमल कोइराला ।
उनले भने, ‘चुस्स चुस्स पैसा छरेर काम गर्नुपर्छ । कुनै भरपर्दाे योजना बनाएर काम गर्न सकिएको छैन । कसरी व्यवस्थित गर्न सकिन्छ ? '
सहरीकरणको मापदण्ड नपुगेका ठाउँलाई जबरजस्ती नगरपालिका घोषणा गरिदिएका कारण पनि भौतिक संरचना निर्माणमा समस्या आइपर्ने गरेको जानकारहरू बताउँछन् ।
सडक विभागको लापरबाही
सडक विभागको चरम लापरबाहीले झापा बिर्तामोडस्थित पूर्वपश्चिम राजमार्ग भत्केर अवरुद्ध भएको छ । आधाभन्दा बढी भाग भत्केको महिनौं भइसके पनि विभागले मर्मत गरेको थिएन । मंगलबारदेखिको अविरल वर्षाले सडक अवरुद्ध हुने गरी भत्किएको हो ।
बिर्तामोड नयाँ बसपार्क प्रवेशद्वारमा रहेको कल्भर्टनजिकको दक्षिणतिरको भाग असार पहिलो साता नै भत्किएको थियो । त्यसपछि भत्किएको भागमा खतराको चिन्ह टाँसेर छाडिएको थियो ।
जिल्ला ट्राफिक प्रहरी कार्यालय झापाका प्रमुख ढुण्डीराज गिरीका अनुसार राजमार्गको दायाँबायाँ दुवैतिरबाट सडक भत्किएर यातायात सञ्चालन गर्न नहुने भएको छ ।
प्रतिक्रिया दिनुहोस !
