व्यावसायिक फेसन डिजाइनिङ र मोडलिङको प्रयास

भक्तपुरः फेसन डिजाइनिङ तथा मोडलिङलाई व्यावसायिक एवं पेसाका रूपमा विकास गर्ने उद्देश्यले भक्तपुरमा चार वर्ष अघिदेखि निरन्तर रूपमा राफल स्नाफल फेसन सो हुँदै आएको छ । यस वर्ष राफल स्नाफलको सिजन फोर शुक्रबार भक्तपुरमा हुँदैछ ।

राफल इन्स्टिच्युट अफ फेसन एन्ड आर्ट (रिफा फेसन स्कुल)ले गर्ने यस फेसन सोको सम्पूर्ण तयारी पूरा भएको रिफाका संयोजक एलेक्स वासुकलाले जानकारी दिए । उनका अनुसार फेसन सोमा १९ जना फेसन डिजाइनरले तयार गरेका पोसाकहरू आठवटा सिक्वेन्समा प्रस्तुत गर्नेछन् ।

रिफाका कार्यकारी निर्देशक रमेश दुवालले उक्त फेसन सोमा काठमाडौं उपत्यकासँगै काभ्रे, चितवन र मोरङका २० जना मोडलहरूले र्‌याम्प नाप्ने जानकारी दिए ।

राफल स्नाफल फेसन सोको कोरियोग्राफरमा भुवनभक्त मुनंकर्मी र फेसन स्टाइलमा रोजन श्रेष्ठ छन् । त्यस्तै मोडलहरूको शृंगार तथा केस सज्जा भने कृष्णा त्यातले गर्नेछिन् ।

भक्तपुर नगरपालिका-१४, राममन्दिरस्थित टुरिजम मार्केटको तलेजु ब्यांक्वेटमा हुने फेसन सोको लागि कोरियोग्राफर र मोडलहरूले एक महिना अघिदेखि अभ्यास गर्दै आएका छन् । त्यस्तै १९ जना फेसन डिजाइनरले तीन महिना अघिदेखि आफ्नो डिजाइन, त्यसको थिम तथा तयारी, इन्स्पिरेसन लगायतबारे तयारी गर्दै आएका छन् । उनीहरूले आआफ्नो सिक्वेन्स अनुसारको दसदसवटा डिजाइनका लुगासमेत तयार गरिसकेका छन् । जुन डिजाइनका लुगामा मोडलहरूले फोटो सुटसमेत गराइसकेका छन् ।

फेसन सोमा प्रस्तुत हुने आठवटा सिक्वेन्सबारे यहाँ छोटो चर्चा गरिएको छ ।

पहिलोः प्रतिशोध अधिकारी र सुनीता बाटीले बर्ड थिममा एभान्गार्ड डिजाइनमा पोसाक तयार गरेका छन् । तर, उनीहरूले तयार गरेको पोसाक विशेष फोटो सुटका लागि मात्रै हो । यी लुगा दसदेखि २५ हजार रुपैयाँसम्म पर्ने प्रतिशोध र सुनीता बताउँछन् । 'सकेसम्म हाम्रो सिर्जनशीलता यसमा पोखेका छौं', उनीहरूले भने, 'बर्निङ फिनिक्स, चराको पखेटा तथा प्वाँखको प्याच वर्क गरेका छौं । हातले नै सबैजसो डिजाइनका काम गरेका छौं ।'

दोस्रोः प्रकृतिप्रधान र देवलक्ष्मी श्रेष्ठले पुतली थिममा इम्ब्रोइडरी तथा प्रिन्टस्को प्रयोग गरी क्याजुअल लुगा तयार गरेका छन् । उनीहरूको लुगा वनपिस छन् । विभिन्न रंगमा बनाइएका यी लुगा जाडोयामलाई लक्ष्य गरेर डिजाइन गरिएको उनीहरूले सुनाए । मध्यम वर्गलाई लक्षित गरी बनाइएका उनीहरूका लुगाको बजारमूल्य आठ सयदेखि चार हजार रुपैयाँसम्म रहेको छ ।

तेस्रोः गीता मूलगठी र प्रमिना सुवालले इन्सेक्ट थिममा क्याजुअल वान पिस डिजाइनका लुगा तयार गरेका छन् । दस जोड दुई पढिरहेका तथा कामकाजी युवतीहरूलाई लक्षित गरेर लुगाको डिजाइन गरिएको उनीहरू बताउँछन् । उनीहरूको डिजाइनमा छाला र लाइक्रा प्रयोग गरी प्याच वर्क, इम्ब्रोइडरी गरिएको छ । उनीहरूका अनुसार सिंगो माहुरी, बिच्छी, फट्यांग्रा आकारको लुगासमेत उनीहरूको डिजाइनमा परेका छन् । त्यसैले यो डिजाइनका लुगा बजारमा आए महँगो पर्ने उनीहरूले बताए ।

चौथोः दामिनी लामा र सायरा राजथलाले नेपाली मौलिकतामा क्याजुअल वेयर डिजाइनमा लुगा तयार गरेका छन् । नेपाली ढाकाको कपडामा उनीहरूले अविवाहित युवतीहरूलाई लक्षित गरेर वन पिस लुगा तयार गरेका हुन् । उनीहरूले तयार गरेको लुगा बजारमा तीनदेखि पाँच हजार रुपैयाँसम्म पर्छ । नेपाली ढाका लुगा भए पनि आधुनिक डिजाइन भएकाले अहिलेका युवतीले उक्त लुगा मन पराउने उनीहरूको दाबी थियो ।

पाँचौं: पूजन श्रेष्ठ र विनीता श्रेष्ठले नेवारी थिममा परम्परागत पोसाकलाई आधुनिकीकरण गरिएको डिजाइनमा लुगा तयार गरेका छन् । उनीहरूले घरबुना कपडासँगै हाकुपटासी, नागबेली नु, जापानी सुती, लेसमा मन्दिर आकार आउने गरी प्यात्च वर्क गरेका छन्, जुन लुगा पाँच हजारदेखि २० हजार रुपैयाँसम्म पर्ने उनीहरूले सुनाए । कुमारीको चित्रसँगै थ्रीडी इफेक्ट गरिएका यी लुगाहरू विशेष गरी पार्टीभोज, सेमिनारमा लगाउन सकिने उनीहरू बताउँछन् ।

छैटौं: अनु शिल्पकार, करुणा मानन्धर, ईश्वरी श्रेष्ठ र रीतु मानन्धरले ब्राइडल (दुलही) थिममा दुलहीलाई उपयुक्त डिजाइनका लुगा तयार गरेका छन् । उनीहरूले लेहेंगा, ब्लाउज र सललाई आफ्नो डिजाइनमा समावेश गरेका छन् । रातो, गुलाबी, सुन्तला, भ्यान्टा रङमा विभिन्न देशका बेहुलीले लाउने लुगाको डिजाइन आफूहरूले गरेको उनीहरू बताउँछन् । 'यी लुगामा प्यात्च, स्टोन, लेस, इम्ब्रोइडरी वर्क सबै हातैले गरेका छौं । त्यसैले यो अरूभन्दा आकर्षक र महँगो पनि छ', उनीहरूले एकै स्वरमा भने ।

सातौं: राधिका धोजू, रजनी प्रजापति र ज्योति निरौलाले एसिया थिममा एसियाली देशका महिलाले लाउने पोसाकको डिजाइन तयार गरेका छन् । उनीहरूका अनुसार एसियाका दस देशका महिलाले राति लगाउने फरकफरक डिजाइनका वन पिस लुगा तयार गरिएको हो । 'आफ्नो परम्परासँगै आधुनिकता मन पराउने महिलालाई लक्षित गरेर लुगाको डिजाइन तयार गरेका छौं', उनीहरूले भने ।

आठौं: अनिता तामाङ र एलिना चवालले डिज्ने प्रिन्सेस थिममा हाइक्लास पार्टी गाउन डिजाइनका लुगा तयार गरेका छन् । उनीहरूले आफूलाई राजकुमारीको रूपमा देखाउन चाहने युवतीहरूले आफूहरूको मोडलको लुगा लगाउनसक्ने बताउँछन् । 'आफूलाई साँच्चिकै राजकुमारी भनी देखाउन चाहनेले हाम्रो डिजाइनको लुगा लगाउन सक्छन्', अनीता र एलिनाले भने, 'हामीले तयार गरेको लुगा लगाउँदा राजकुमारी नै देखिएको अनुभूति हुन्छ ।' मध्यम वर्ग लक्षित यो डिजाइनको लुगा बजारमा सातआठ हजार रुपैयाँसम्म पर्ने उनीहरूले सुनाए ।