कलाकारको कफी क्याफे

जुनसुकै पेसामा सामान्य अवस्थाले कहीँ पुगिँदैन भन्ने लाग्यो कृति भट्टराईलाई । पेसाले कलाकार र सञ्चारकर्मी भए पनि उनलाई सामान्य अवस्थामा रहिरहन मन लागेन । 'कि त उत्तम हुनुपर्छ, कि खत्तम', कृतिले भनिन्, 'मध्यम खालको अवस्थाले केही हुँदैन ।' उनको यही सोचले कफीपारखीलाई थप अवसर जुटाइदिएको छ । शान्त वातावरणमा नयाँ स्वाद थपेकी छन् कृतिले ।

नयाँ बानेश्वरदेखि अनामनगर जाँदै गर्दा दुई सय मिटर अगाडि देब्रे किनारमा एस्प्रेसो अर्गानिक क्याफे स्थापित छ । कलाकारिता र सञ्चारजगत्मा दशक बिताएकी कृतिले आर्थिक रूपमा सबल नभएसम्म थप प्रगतिहरू टाढा देखेपछि कफी क्याफे सञ्चालनमा ल्याएकी हुन् । व्यस्त बजारको किनारमा पनि शान्त, सफा, अर्ग्यानिक र असली स्वादको तातो, चिसो कफी पस्कने योजनासहित उनले एस्प्रेसो अर्गानिक कफी क्याफे सञ्चालन गरेको बताइन् ।

कलाकारितामा दिनरात आफ्ना सुख, दुःख नभनी लाग्नेहरूका लागि एक दिन सफलता पर्खिएको भए पनि त्यो धैर्य नभए यो क्षत्र नफाप्ने उनले बुझेकी छन् । १७ वर्षअघि बुवा सुरेन्द्रज्योति भट्टराई र तीन वर्षअघि आमा जया भट्टराईले छोडेर गए पनि उहाँहरूले दिएको हिम्मत, साहस र स्वाभिमानको यात्रालाई आफूले पछ्याएको उनले बताइन् ।

उनले कफी क्षेत्रमा २० वर्ष अनुभव बटुलेका मानबहादुर श्रेष्ठको सहकार्यमा क्याफे स्थापना गरेकी हुन् । समुद्री सतहदेखि आठ सय मिटरदेखि १२ मिटर उचाइमा फल्ने कफीको अग्र्यानिक स्वाद पस्कनु उनको विशेषता हो ।

क्याफेमा रहँदा उनी कुनै कलाकार वा एंकरजस्तो लाग्दिनन् । मन्द मुस्कानले अतिथि सत्कार र स्वादिलो कफी पस्कँदा उनी व्यावसायिक देखिन्छिन् । इमेज ग्रुप अफ कम्पनीमा लामो समय प्रस्तोता, समाचारवाचिका र अन्तर्वार्ताकारको भूमिकामा रहेकी कृति यति बेला क्याफेमा अमेरिकानो, क्यापाचिनो, ब्लान्डेड मोक्कालगायतका चिसो, तातो कफी 'सर्भ' गरिरहेकी हुन्छिन् ।

आरआर क्याम्पसबाट पत्रकारितामा स्नातकोत्तर गरेकी उनी भन्छिन्, 'आज हरेक घरको एक सदस्य विदेशमा छ, म राजधानीकी रैथाने भए पनि आज गाउँ युवाविहीन भएका छन्, विदेशमा हामी टेबल पुछ्न मञ्जुर हुन्छौं भने आफ्नै देशमा गरिखान किन गाह्रो मान्ने ? '

उनले क्याफेमा आउने पाहुनाका लागि हल्का खाजाका लागि स्यान्डबिच, बर्गर र बेकरीका परिकार पनि पस्कने गरेकी छन् ।