भलिबलकी आसलाग्दी समीक्षा
काठमाडौं कलंकीकी समीक्षा घिमिरे भर्खर १५ वर्षकी भइन् । घरछेउकै न्यु डायमन्ड एकेडेमीमा कक्षा ९ मा पढ्दै गरेकी समीक्षा बोल्न र सुन्न सक्दिनन् । बोल्न र सुन्न नसक्ने समीक्षाको प्रतिभा भने आफैंमा उदेकलाग्दो छ ।
बोल्न र सुन्न नसकेर के भो र । समीक्षा भलिबलकी आसलाग्दो खेलाडी हुन् । पढाइमा पनि उनी राम्रो छिन् । स्कुलमा उनलाई बोल्ने र सुन्ने साथीसँगै राखेर पढाइन्छ । सुन्न नसक्ने भएकोले उनलाई शिक्षकले लेखेर पढाउने गर्दछन् । लेखेर दिएको कुरा प्रतिभाले छिटै टिप्छिन् । 'तर अन्य साथीसँगै राखेर पढाउँदा बुझाउने प्रक्रियामा भने केही कठिन हुँदो रहेछ । लेखेर दियो भने प्रतिभाले एक सय शब्द एकैछिनमा कण्ठ गर्छिन्', न्यु डायमन्डका प्रिन्सिपल एवं भलिबलका प्रशिक्षक कुमार राई भन्छन् ।
त्रिपुरेश्वरस्थित राष्ट्रिय खेलकुद परिषद्को कभर्डहल अघिल्लो साता समीक्षा समावेश न्यु डायमन्डको टोलीले एनभीए कप महिला भबिलको उपाधि जित्दा कभर्ड हलको माहोल उल्लासमय बन्यो । एक सातासम्म चलेको एनभीए कप पुरुष र महिला भलिबल प्रतियोगिताका कारण कभर्डहलको रौनक नै चुलिएको हो । महिला र पुरुषको फाइनल खेल हेर्न कभर्डहल पुगेका हजारौं दर्शकले ध्यान न्यु डायमन्डका किशोरी खेलाडीमा तानियो ।
न्यु डायमन्ड टोलीकी अलराउन्डर खेलाडी समीक्षा घिमिरेको प्रदर्शनले दर्शक र भलिबलप्रेमीको मन जित्न सफल भयो । कान नसुन्ने र बोल्न नसक्ने समीक्षा विपक्षीको जस्तोसुकै प्रहार थाप्न सक्छिन् । विपक्षीले कस्तो सट हान्छन् उनलाई भेउ हुन्न । तर डुङ्गडुङ्ग आएको आवाज सुन्दा जस्तो मै हुँ भन्नेलाई पनि थाप्न गाह्रो लाग्छ । यस्तो प्रहार छेक्ने समीक्षाको क्षमता अपारको छ ।
'भगवान्ले पनि साथ दिँदो रहेछन् क्यारे । समीक्षाले खेलेको देख्दा मलाई उदेक लाग्छ । कान नसुन्ने र बोल्न नसक्ने भए पनि उनी कोर्टमा ध्यान दिएर खेल्छिन् । विपक्षीको जस्तोसुकै पावर सट आओस् उनलाई मतलव छैन । पोजिसनमा बसेर नियन्त्रण गर्नु उनको विशेषता नै हो । रक्षापंक्तिमा समीक्षाको विशेष दक्खल छ । अलराउन्डर भए पनि उनलाई कोर्टका जोन नम्बर १ को जिम्मेवारी दिइएको छ । उनी आफ्नो जोनकी खम्बा नै हुन्', प्रशिक्षक राई भन्छन् ।
समीक्षालाई विशेष गाह्रो सर्भिस गर्ने बेलामा पर्छ । रेफ्रीले सिठ्ठी बजाएको नसुन्ने भएकोले उनी रेफ्रीलाई हेरेर बस्छिन् । सिठ्ठीको आवाज नसुन्दा उनी रेफ्रीले हातको इसारा गरेपछि मात्र सर्भिस गर्छिन् ।
हाउभाउ र कपीमा लेखेरमात्र संवाद गर्ने समीक्षाले तीन वर्षमात्र भयो भलिबल खेल्न थालेको । पढाइलाई अझै सुधार गर्न कक्षा ९ मा दोहोर्याउने निर्णयमा पुगेकी समीक्षाका बुबा नेपाल पुलिसका जागिरे हुन् । उनका बाबु शिवप्रसाद घिमिरे र आमा कल्पना घिमिरेले एक दिन न्यु डायमन्ड गएर उनै प्रिन्सिपल एवं प्रशिक्षक कुमार सरसँग सल्लाह गरे । कक्षा ६ मा पढ्दै गरेकी छोरीलाई के गर्न सकिएका भनेर ।
परिवारकी एक्ली छोरी समीक्षाको भविष्यका विषयमा चिन्तित अभिभावकलाई कुमारले भलिबल खेलाउन सल्लाह दिए । परिवारले मेरै सल्लाहमा भलिबल खेल्न अनुमति दियो । मैले नै सिकाएर उनलाई यहाँसम्म ल्याएँ, कुमार भन्छन् ।
समीक्षाको विषयमा कुरा गरिरहँदा कुमारको इसारामा खुसी देखिएकी समीक्षाले आफूलाई कुमार सरको प्रेरणा र सिकाइले सबै साथी सरह खेल्न र पढ्न सकेको लेखेरै बताइन् । 'भविष्यमा ठूलो खेलाडी बनेर देशलाई चिनाउने योजनामा छु ।
बुवा पुलिसको सई हुनुहुन्छ । तर म आर्मी बन्न चाहन्छु', समीक्षाले भविष्यको योजना सुनाइन् । समीक्षाजस्तै उनका दाजु सविन पनि जन्मजात बोल्न र सुन्न सक्दैनन् । सविन पनि न्यु डायमन्डमै कक्षा १० मा पढ्छन । चिकित्सकले कानमा राखिदिएको उपकरणका आधारका दुवैजनाको सुन्ने क्षमतामा थोरै बढ्दै गएको छ ।
देशभर आयोजना हुने भलिबलमा न्यु डायमन्ड दर्शकको सर्वाधिक समर्थन पाउने टोली पनि हो । नेपालमा महिला भलिबल खेलको नाम लिँदा न्यु डायमन्ड एकेडेमी छुट्यो भने अपुरो नै हुन्छ । उमेर र अनुभवले कलिला देखिने न्यु डायमन्डका खेलाडीको भलिबल खेल कुनै अन्तर्राष्ट्रिय टोलीको भन्दा कम छैन ।
न्यु डायमन्डले २०७३ सालमा नेपालमा भएको तीनवटा राष्ट्रिय महिला भलिबल प्रतियोगितामध्ये दुई वटामा उपाधि नै जितेको छ । भर्खर मात्र एनभीए कप भलिबलमा नेपालको सशक्त टोली नेपाल पुलिस क्लबलाई हराएर न्यु डायमन्ड च्याम्पियन बन्यो । एक महिनाअघि पोखरामा सम्पन्न लामाचौर राष्ट्रिय महिला भलिबलको उपाधि जितेको न्यु डायमन्डले अर्को विभागीय टोली एपीएफ क्लबलाई ३-० सोझो सेटमा हराएको थियो ।
लगातार चाथो पटक लामाचौर राष्ट्रिय महिला भलिबलको उपाधि जितेको न्यु डायमन्डले सबै संस्करणको फाइनलमा बलियो विभागीय टोलीलाई नै हराएको थियो । यसै वर्ष भएको शेरबहादुर खड्का स्मृति राष्ट्रिय भलिबल प्रतियोगितामा भने न्यु डायमन्ड तेस्रो भएको थियो ।
पाँच फिट अग्ली समीक्षा न्यु डायमन्डकै चर्चित खेलाडी प्रतिभा मालीकी मनपर्ने साथी पनि हुन् । कुमार सरले जस्तै प्रतिभाले पनि समीक्षालाई राम्रो हेरचाह गर्छिन् । एउटै कक्षाका उनीहरू यो वर्ष नराम्रोसँग रोए । समीक्षाले पढाइलाई थप सुधार गर्न ९ कक्षामा दोहोर्याउने निर्णय गर्दा १० कक्षामा उक्लिएकी प्रतिभालाई नरमाइलो लागेको थियो । न्यु डायमन्डकी प्रतिभा राष्ट्रिय टोलीको भरपर्दी स्पाइकर पनि हुन् ।
न्यु डायमन्ड टोलीकी अलराउन्डर खेलाडी समीक्षा घिमिरेको प्रदर्शनले दर्शक र भलिबल प्रेमीको मन जित्न सफल भयो । कान नसुन्ने र बोल्न नसक्ने समीक्षा विपक्षीको जस्तोसुकै प्रहार थाप्न सक्छिन् । विपक्षीले कस्तो सट हान्छन् उनलाई भेउ हुन्न ।
२०६२ सालमा संखुवासभाबाट काठमाडौं आएर न्यु डायमन्ड एकेडेमी सञ्चालन गरेका प्रशिक्षक कुमार स्कुलका आफैं प्रिन्सिपल भएकोले खेलाडीलाई पढाउन र खेलमा लगाउन सक्षम देखिएका छन् । 'पहिला भलिबलको खेलाडी म । क्षेत्रीय स्तरसम्म राम्रो खेल्दै आएँ । तर राईको छोरो हाइटले साथ दिएन ।
बेलायती सेनाका जागिरे मेरो बुबाले पनि भलिबल नखेल भन्नुभयो । तर लागेको बानीलाई छाड्न गाह्रो हुँदो रहेछ । भलिबलको भोक भेट्न न्यु डायमन्डमा २०६४ सालदेखि साना नानीलाई भलिबल खेल सिकाउन पनि थाले', कुमारले भने ।
प्रतिमा र समीक्षाजस्तै दर्जनौं खेलाडी उत्पादनमा लागेका ४६ वर्षीय कुमारले खेलमा लाग्नु भनेको मनैदेखि भिज्नु रहेको बताए । मन भिजाउन लगानी, मेहनत, अनुशासन र धैर्य पनि चाहिने । सबै चिज मिल्यो भने असम्भवभित्र पनि सम्भव हुँदो रहेछ ।
राम्रो खेलाडी बनाउन आर्थिक लगानी र मेहनत पहिलो सर्त हो । म साना नानीलाई राम्रो विद्यार्थी र खेलाडी दुवै बनाउने अभियानमा लागेको छु । तर आर्थिक हिसाबले गाह्रो हुँदो रहेछ । कुराकानीका क्रममा धेरै खुसी देखिएका कुमारले सफलताका लागि पाएको दुःखको पाटो खोल्दै अन्तिममा कुराकानीलाई बिट मार्दै भने–हेरौं कहाँसम्म पुगिन्छ ।