कञ्चनपुर: कञ्चनपुरको भीमदत्तनगरपालिका–५ त्रिपुरामा भारतीय नम्बर प्लेटको मोटरसाइकलको ठक्करबाट एक जनाको मृत्यु भएको छ।
गएराति युए ०३ एस ३१४१ भारतीय नम्बरको मोटरसाइकलले ठक्कर दिँदा भीमदत्तनगरपालिका–१० सुकासालका अन्दाजी ३८ वर्षीय लालु पहरीको मृत्यु भएको हो। ठक्करबाट गम्भीर घाइते भएका पहरीको उपचारका क्रममा मृत्यु भएको जिल्ला प्रहरी कार्यालय कञ्चनपुरका प्रहरी नायब उपरीक्षक नैनसिंह कार्कीले बताए।
दुर्घटनामा मोटरसाइकल सवार भारत टनकपुरका ३० वर्षीय भगवान दास र साइकलमा सवार पहरी घाइते भएका थिए।
घाइते दुवै जनालाई तत्कालै प्रहरीले उपचारका लागि महाकाली अञ्चल अस्पतालमा पुर्याएको थियो। भारतीय नागरिक दासको भने महाकाली अञ्चल अस्पतालमा उपचार भइरहेको छ।
प्रतिक्रिया दिनुहोस !
