बक्राहा खोला फेरि गाउँ पस्यो

विराटनगर: मोरङको मावा खोला र बक्राहा खोलामा आएको बाढी गाउँ पस्दा एकजनाको मृत्यु भएको छ भने ३० परिवार विस्थापित भएका छन् ।

मधुमल्ला गाविस ३ स्थित तोरीबारीमा मावा खोलाले बगाउँदा परिचय नखुलेका अन्दाजी ४० वर्षीय पुरुषको मृत्यु भएको इलाका प्रहरी कार्यालय उर्लाबारीले जनाएको छ । शव खोलाले बगाएर ल्याएको अवस्थामा भेटिएको उर्लाबारीका प्रहरी निरीक्षक राजकुमार राईले बताए ।

पहाडी क्षेत्रसहित आसपासमा भीषण वर्षासँगै खोलामा पानीको बहाव उच्च भएपछि बक्राहा पुरानै स्थानबाट गाउँ पसेको हो । मोरङको इटहरा गाविस ३ स्थित धरमभकारीबाट पुनः खोलो गाउँ पस्दा जयनगर बस्तीका ३० परिवार विस्थापित भएका छन् ।

यही स्थानबाट ७० मिटर लामो बाँध फुटाएर बक्राहा खोलो गत बुधबार गाउँ पसेको थियो । त्यतिबेला बाढीले २५ परिवार विस्थापित भएका थिए । खोला गाउँ पसेपछि तीन सयभन्दा बढी घर डुबानमा परेका थिए । इटहरा ३ मा पाँच घर बगाएको थियो । बुधबार विस्थापित भएकाहरू अहिलेसम्म घर फर्कन नसकिरहेका बेला फेरि बक्राहाले थप ३० परिवारलाई विस्थापित गराएको प्रहरीले जनाएको छ ।

पाँच दिनअघि खोलाले भत्काएको बाँध निर्माण गरेर खोला नियन्त्रणको प्रयास नगरिँदा त्यही ठाउँबाट दोस्रोपटक खोलो गाउँ पसेको स्थानीयको भनाइ छ । खोला गाउँ पसेपछि आपत्कालीन उद्धारका लागि नेपाल प्रहरी र सशस्त्र प्रहरी परिचालन गरिएको छ ।

शनिबार साँझबाट अविरल वर्षा नरोकिएसँगै बक्राहामा बाढी आएको र त्यही बाढी गाउँ पसेको प्रहरी चौकी इटहराका सहायक निरीक्षक सीताराम भण्डारीले बताए । बाढीका कारण विस्थापित बनेकाहरू आफन्त र छिमेकीको शरणमा छन् ।

खोलामा आएको बाढीका कारण इटहराका ३, ४ र ५ नम्बर वडा डुबानमा परेका छन् । यी वडा यसअघि पनि डुबानमा परेका थिए । प्रसनि भण्डारीले तत्काल खोलो नियन्त्रणको प्रयास नगरिए थप क्षति हुने खतरा बढेर गएको छ । 'पहाडी क्षेत्रमा वर्षा हुने क्रम रोकिएको छैन', उनले भने, ‘खोलामा पानीको बहाव नघटेका कारण स्थानीय बासिन्दा त्रासमा छन् ।'

इटहरा ३ का चन्द्रकान्त रिजालले बाढीपीडितका पक्षमा सरकारी निकायले कुनै सहयोग नगरेको बताए । उनको परिवार गत बुधबार बाढी गाउँ पसेपछि विस्थापित भएको थियो । रिजालले भने, 'हामी विस्थापित भएको लामो समय भइसक्यो तर अहिलेसम्म राहत र उद्धारको कुनै पनि काम भएको छैन ।' बाढीले धेरै खेतीयोग्य जमिन कटान गर्नुका साथै लगाएको धानबालीसमेत बगाएको उनले बताए ।