टालेरै सकियो सडकको बजेट

बनेपा: मध्यमाञ्चल सडक डिभिजन कार्यालय भक्तपुरले बनेपा-पनौतीखण्डको सडक स्तर उन्नति गर्न छुट्ट्याएको बजेट टालेर मात्रै सकिएको छ । प्रत्येक वर्ष मर्मतसम्भार गर्न करोडौं रुपैयाँ खर्च गरे पनि उक्त सडकखण्डको स्तर उन्नति हुनसकेको छैन ।

'सडक स्तर उन्नति गर्न प्रत्येक वर्ष बजेट आयो तर बाटो जस्ताको तस्तै छ', पनौतीका ५ का राजन कर्माचार्यले भने, 'बर्सैपिच्छे आएको बजेट सक्ने काममात्र भएको छ ।' बनेपा-पनौती सडकखण्ड ठेकेदार र कर्मचारीका लागि कमाइखाने भाँडो भएको छ । उनले भने, '५ किलोमिटर बाटोमा एक हजारभन्दा बढी खाल्टा छन् ।'

'निर्माणका लागि सडक पेटीमा थुपारिएको निर्माण सामग्रीले सडक झन् साँघुरो हुँनुको साथै दुर्घटनासमेत हुने गरेको छ', पनौती ३ का स्थानीय सौगात बस्नेतले भने, 'घाम लागेको बेला धुलो उड्ने र पानी परेको बेला हिलाम्ये हुने भएकाले सवारी साधन र यात्रु आवतजावत गर्न कठिन हुन्छ ।'

'ठूलो पानी आयो भने सडक नै अवरुद्ध हुन्छ । बसबाट आर्लेर पैदल हिँड्नुपर्ने बाध्यता छ', कुशादेवी गाविसका राकेश सापकोटाले भने, '२० मिनेटमा पुगिने कार्यालय जान २ घन्टाअघि तयार भएर हिँड्नुपर्छ ।'

डिभिजन कार्यालय भक्तपुरले बनेपा-पनौती सडक मर्मतका लागि २०७१ मंसिर २४ गते ४२ लाख ४२ हजारमा ठेक्का खोलेको थियो । उक्त टेन्डरमा बीएसपी निर्माण सेवाले ६५ प्रतिशत कम लागत १४ लाख ४८ हजारमा बाटो मर्मतको ठेक्का लिएको थियो । ठेक्का लिएर काम गरेको कम्पनीले गुणस्तरहीन निर्माण सामग्री प्रयोग गरेपछि सडकको अवस्था झन् बिग्रिएको छ ।

गत आर्थिक वर्षको वैशाखमा ८० लाखको बजेटमा पनौतीको ६ किलोमिटर सडक मर्मत गरिएको थियो तर मर्मत गरेको केही महिनामै पिच उप्किएको थियो । केही महिनाअघि तीन करोडको लागतमा गरिएको कालोपत्रे समेत उप्किएपछि स्थानीय आक्रोशित भएका छन् ।

सडक डिभिजन कार्यालय भक्तपुरका इन्जिनियर ध्रुव श्रेष्ठले दसैंअघि सडक पिच हुन नसके पनि सामान्य मर्मतसुधार गरिने बताए । उनले भने, 'ठेक्काको समय चैतसम्म छ । अहिले लगातारको वर्षाले काम अगाडि नबढेको हो । कात्तिकसम्म काम सम्मन्न हुन्छ ।'

डिभिजन कार्यालयले पनौतीदेखि सुब्बागाउँसम्म २ करोड ५२ लाख रुपैयाँमा कालोपत्रे गरेको थियो भने सुब्बागाउँदेखि बनेपासम्मका लागि ४ करोड १३ लाखमा ठेक्का दिए पनि ठेकदार कम्पनीले काम गर्न सकेको छैन । बाटोमा भएका खाल्टासमेत पुरिएका छैनन् ।

 

सडक डिभिजन कार्यालयले समयसमयमा कालोपत्रे टाल्ने र ड्रेन मर्मत तथा खाल्टा पुर्ने कामबाहेक दीर्घकालीन व्यवस्थापन गरेको छैन । यही सडकबाट करोडौं रकम राजस्व संकलन गर्दै आएको पनौती नगरपालिका र जिल्ला विकास समिति पनि सडकको दुरवस्था हँदासमेत मौन बसेको स्थानीयको आरोप छ ।

पनौती नगरपालिकाका प्रशासकीय अधिकृत इन्द्र अधिकारी टालटुल गरेको भरमा पनौती-बनेपा सडकमा सुधार नआउने बताउँछन् । 'टालटुलभन्दा पनि दिगो निर्माणका लागि सोच्नुपर्छ । दैनिक हजारौं हेभी ट्रिपर, मिनीबस र साना तथा निजी सवारी साधन चल्छन् ।

यसका लागि दीर्घकालीन स्तर उन्नतितर्फ लाग्नुपर्छ', उनले भने, 'पनौतीमा क्षेत्रीय स्तरको रंगशाला, नेपालकै नमुना प्रहरी तालिम केन्द्र निर्माण हुँदैछन् । अब सडकको भार र क्षमता बढाउनु अत्यन्त जरुरी भइसक्यो । यसका लागि नगरपालिकाको बजेटले भ्याउँदैन । राष्ट्रियस्तरको बजेटको आवश्यकता पर्छ ।'

बाटो जीर्ण हँदा सदरमुकाम धुलिखेल र राजधानी जोड्ने पनौती नगरपालिकासहित डाँडापारिलगायत १५ गाविसका स्थानीय समस्यामा परेका छन् ।