बसले कार ठक्करलाई ठक्कर दियो, चालकको मृत्यु
विराटनगरः मोरङमा यात्रुबाहक बसले भारतीय नम्बर प्लेटको कारलाई ठक्कर दिँदा एक जनाको मृत्यु भएको छ।
पूर्वपश्चिम राजमार्ग अन्तर्गत मोरङको बेलबारी–३ मा सोमबार बिहान ना ४ ख ७५६१ नम्बरको बसले बीआर ११ यु ३४२१ नम्बरको कारलाई ठक्कर दिएको थियो। ठक्करबाट कार चालक भारत सुपौलका ३५ वर्षीय विनय जैसवालको घटनास्थलमै मृत्यु भएको इलाका प्रहरी कार्यालय बेलबारीका प्रहरी निरीक्षक मेघराज थापाले जानकारी दिए।
प्रहरी निरीक्षक थापाका अनुसार यात्रुबहाक बसले गलत दिशामा पुगेर विपरित दिशाबाट आउँदै गरेको कारलाई ठक्कर दिएको हो। ठक्करबाट कार पूर्ण रुपमा क्षति पुगेको छ।
कार चालक जैसवाल मोरङको उर्लाबारीस्थित ससुराली पुगेर धरानतर्फ फर्कदै गरेको अवस्थामा दुर्घटनामा परेको प्रहरीले जनाएको छ। प्रहरीले जैसवालको शव क्षतविक्षत अवस्थामा फेला परेको जनाएको छ।
ठक्कर दिने बस र चालकलाई प्रहरीले आफ्नो नियन्त्रणमा लिएर अनुसन्धान सुरु गरेको छ।
प्रतिक्रिया दिनुहोस !
