पहिरोमा बेपत्ता रञ्जनाको शव भेटियो
गोरखाः गोरखाको उइया र केरउँजा गाविसको बीचमा गएको पहिरोमा परी बेपत्ता रञ्जना बस्नेतको शव फेला परेको छ ।
उद्धारमा सक्रिय सुरक्षाकर्मीको टोलीले रञ्जनाको शवलाई पहिरो नजिकैको खोला किनारमा फेला पारिएको गोरखाका प्रहरी प्रमखु एसपी जनकराज पाण्डेयले जानकारी दिए ।
रावादोलु सात ओखलढुंगा घर भई कम्युनिटि एक्सन नेपाल क्यानमा कार्यरत रञ्जना माथिबाट तल झर्ने क्रममा पहिरोमा परेकी थिइन् । मनास्लु पदयात्राका लागि गएका तीन जनाको शव फेला पारिएको थियो भने उनी बेपत्ता थिइन् ।
उनको खोजीमा जुटेको नेपाल प्रहरी, सशस्त्र प्रहरी तथा नेपाली सेनाको टोलीले मंगलबार बिहान शव फेला पारेको थियो । उद्धारका लागि घटनास्थलमा नेपाल प्रहरीका सात, सशस्त्र प्रहरीका ११ र नेपाली सेनाका २६ जवान परिचालन गरिएको थियो ।
उक्त पहिरोमा परी एक बिदेशीसहित चार जनाको मृत्यु भएको थियो । पहिरोमा १० नेपालीसहित २४ जना घाइते भएका थिए ।
प्रतिक्रिया दिनुहोस !
