एक पोका रगत नपाउँदा अस्पतालमै गर्भवतीको ज्यान गयो
सुर्खेत : समयमै रगत नपाउँदा मध्यपश्चिम क्षेत्रीय अस्पताल सुर्खेतमा एक गर्भवती महिलाको मृत्यु भएको छ । दैलेख बाँसीकी २२ वर्षिया शोभा शाहीको मृत्यु भएको हो ।
६ महिनाकी गर्भवती शोभालाई अत्याधिक रक्तश्राव भएपछि आफन्तले मंगलवार विहान अस्पतालमा भर्ना गरेका थिए । उपचारकै क्रममा उनको अस्पतालमै मृत्यु भएको हो ।एक पोका रगत उपलब्ध नहुँदा शोभाले गर्भसहित ज्यान गुमाउनुपरेको छ।
एकाएक रक्तश्राव भएपछि आफन्तले शोभालाई मंगलवार विहान ५ बजे नै अस्पताल पुर्याएका थिए । रक्तश्राव भए पनि शोभा आफन्तसँग बोल्ने र खाने गरिरहेकी थिइन् । उपचारमा समस्या हुने भन्दै स्वास्थ्यकर्मीले शोभाका सबै आफन्तलाई बाहिर निकाले ।
भर्ना भएको पाँच घण्टापछि अस्पतालले शोभालाई बचाउन नसकिएको खबर आफन्तलाई सुनायो । शोभालाई कुनै पनि हालतमा बचाउने बाचा दिएर रातारात अस्पताल पु¥याएका उनका आफन्तहरु जब मृत्युको खबर सुने तब छाँगाबाट खसेजस्तै भए ।
मृतक शोभाका श्रीमान् टेकबहादुर शाहीले भने,‘घरमा खतरा हुन्छ भनेर रातारात अस्पताल ल्याएका थियौं, धेरै रगत बगेको थियो । यहाँ निको नहुने भए बाहिर लैजान्छौं भनेका थियौं, तर नर्सहरुले वास्ता नै गरेनन् ।’अस्पतालमा भर्ना गरेको पाँच घण्टासम्म पनि डाक्टर नआएको र नर्सहरुले पनि उपचारमा ध्यान नदिएपछि श्रीमतीको मृत्यु भएको उनको आरोप छ ।
मृतकका आफन्तहरुले अस्पतालले उपचारमा लापरबाही गरेकै कारण शोभाको ज्यान गएको भन्दै डाक्टरहरुको राजीनामा मागेका छन् । मृतक शोभाका दाजु ऐनबहादुर शाहीले भने,‘ज्यान बच्ला भनेर अस्पताल ल्यायौं, यो त ज्यानमारा अस्पताल रहेछ । डाक्टरले वास्तै गरेनन्, उपचार गर भन्दा उल्टै हामीलाई बाहिर निकाले ।’ आफुहरुलाई बाहिर निकालेर पाँच घण्टासम्म बहिनीलाई कोठाभित्र उपचारविना राखिएकै कारण मृत्यु भएको उनको आरोप छ ।
यसअघि जेठ ३१ गते सुत्केरी व्यथाले च्पापेपछि आफै हिँडेर अस्पताल पुगेकी वीरेन्द्रनगर–२२ गुप्तीपुरकी २६ वर्षिया तीला गन्धर्माको पनि अस्पतालमै मृत्यु भएको थियो । उनका आफन्तहरुले पनि अस्पतालको लापरबाहीका कारण तीलाको ज्यान गएको भन्दै अस्पतालमा नानाबाजी गर्दै दोषीमाथि कारबाहीको माग गरेका थिए । घरमा सुत्केरी गराउँदा जोखिम हुने भन्दै आफन्तले अस्पतालमा भर्ना गराएका थिए ।
तिला र उनको गर्भमा रहेको बच्चाको अस्पतालमै मृत्यु भएको थियो । त्यतिबेला पनि अस्पतालमा भर्ना भएपछि डाक्टरहरुले कुनै चासो नदिएको र वेवास्ता गरेकै कारण मृत्यु भएको आफन्तको भनाइ थियो । आफन्तले शल्यक्रिया गरेर बच्चा निकाल्न बारम्बार आग्रह गर्दा समेत अस्पतालले वेवास्ता गर्दा बच्चा जन्माउन नसकेर तीलाको मृत्यु भएको थियो ।
क्षेत्रीय अस्पतालमा भर्ना भएर वेडमै ज्यान गुमाउने शोभा र तीला केवल उदारण मात्र हुन् । ज्यान जोगाउने आशमा रातारात अस्पतालमा पुर्याइएका सुत्केरी र गर्भवतीको उपचारमा लापरबाही हुँदा धेरै महिलाहरुले अस्पतालमै ज्यान गुमाउनु परेको छ । नाम अनुसारको सेवा नहुँदा क्षेत्रीय अस्पतालप्रति विरामी र तिनका आफन्तहरुले बारम्बार अस्पतालको सेवाप्रति गुनासो गर्दै आएका छन् ।
तर अस्पतालको सेवा प्रवाहमा भने सुधार आउन सकेको छैन । पछिल्लो समय यो अस्पतालमा सुत्केरी र गर्भवती महिलालाई बचाउँनै मुश्किल हुने गरेको भन्दै स्थानीयले अस्पतालप्रति नै अविश्वास गर्न थालेका छन् । अर्कोतर्फ अस्पतालले हिजोआज सुत्केरी हुन आएका महिलाहरुलाई नेपालगंज रिफर गर्न थालेको छ । अस्पतालमा गर्भवती र सुत्केरीको मृत्यु हुँदा आफन्तले तनाव दिने गरेको भन्दै अस्पतालले जिल्ला बाहिर रिफर गर्न थालेको हो ।
यता अस्पताल प्रशासनले भने लापरबाही नभई उपचार गर्दागर्दै शोभाको मृत्यु भएको जनाएको छ । अस्पतालका मेडिकल सुपरिटेण्डेण्ट डाक्टर डम्बर खड्काले सामान्य अवस्थामै शोभाको मृत्यु भएको बताए । उनले भने,‘उनको अवस्था सामान्य थियो, हामीले उपचार गरिरहेका थियौं । तर एक्कासी रगत वान्ता भयो, हामीले बचाउन सकेनौं ।’ उनका अनुसार शरिरमा रगतको मात्रा कम हुँदै गएपछि शोभालाई रगत चढाउने निर्णय गरिएको थियो । तर चार घण्टासम्म पनि अस्पतालमा रगत नपाइएपछि उनको मृत्यु भएको डाक्टर खड्काले जानकारी दिए । उपचारमा लापरबाही भएको भन्ने आरोप गलत भएको उनको जिकिर छ ।
प्रतिक्रिया दिनुहोस !
