इजरायलका पूर्वराष्ट्रपति पेरेजको निधन
जेरुसेलमः नोबेल शान्ति पुरस्कार विजेता इजरायलका पूर्वराष्ट्रपति तथा प्रधानमन्त्री सिमोन पेरेजको बुधबार निधन भएको छ ।
दुई सातादेखि सिकिस्त विरामी पेरेजको ९३ वर्षको उमेरमा स्थानीय समयअनुसार बिहान ०३ बजे निधन भएको पेरेजका छोरीज्वाइँ रफी वालडेनले जानकारी दिए ।
पेरेज १३ सेप्टेम्बरमा तेल अभिभ नजिकै रहेको अस्पतालमा भर्ना भएका थिए ।
अत्यधिक रक्तस्राव भएर स्वास्थ्य बिग्रिएपछि उनलाई अस्पताल भर्ना गरिएको थियो । पेरेज दुईपटक प्रधानमन्त्री र एकचोटि राष्ट्रपति बनेका थिए । जीवनको उत्तरार्धसम्म पनि उनी सक्रिय राजनीतिज्ञका रूपमा क्रियाशील थिए ।
प्यालेस्टिनीसँग शान्ति सम्झौता गराउन महत्वपूर्ण भूमिका निर्वाह गरेको भन्दै उनलाई सन् १९९४ मा नोबेल शान्ति पुरस्कार दिइएको थियो । इजरायल र प्यालेस्टाइनबीच भएको ओस्लो सन्धिमा महत्वपूर्ण भूमिका खेलेको भन्दै नोबेल पुरस्कार दिइएको थियो । इजरायलका तत्कालीन प्रधानमन्त्री यित्ज्याक रोबिन, प्यालेस्टाइनी नेता यासेर अराफातसँगै उनले संयुक्त रूपमा नोबेल शान्ति पुरस्कार पाएका थिए ।
उनको निधनप्रति विभिन्न देशका सरकार प्रमुख तथा राष्ट्रप्रमुखले दुःख व्यक्त गरेका छन् । अमेरिकी राष्ट्रपति बाराक ओवामाले शान्तिका लागि सधैंभरी प्रयत्न गरिरहने व्यक्तिका रूपमा उनलाई स्मरण गरेका छन् ।
उनी पेरेजको अन्त्येष्टि कार्यक्रममा सहभागी हुनु शुक्रबार इजरायल जाने भएका छन् । संयुक्त राष्ट्रसंघका महासचिव बान की मुनले पनि शोक वक्तव्य प्रकाशित गरी शान्ति स्थापनामा महत्वपूर्ण भूमिका खेलेका पेरेजको निधनले दुःखित बनाएको बताएका छन् ।
‘विश्वमा पेरेजजस्ता सीमित मान्छे छन्, जसले विश्वलाई नै परिवर्तनको वाहक बनेर मानव इतिहासमा ठूलो योगदान गर्नुभएको छ । उहाँ हाम्रो शक्ति र नैतिकताका स्रोत पनि हुनुहुन्छ’, ओवामाले वक्तव्यमा भनेका छन् ।
अमेरिकाकै पूर्वराष्ट्रपति बिल क्लिन्टनले पनि पेरेजलाई शान्ति र मेलमिलापका अभियन्ताको रूपमा सम्झना गरेका छन् । इजरायलकै प्रधानमन्त्री बेन्जामिन नेतान्याहुले गहिरो शोक व्यक्त गरेका छन् भने प्रतिपक्षी दलका नेता इस्साक हेर्जङले इजरायलको इतिहासका प्रतीक भएकाले पेरेजलाई कहिल्यै भुल्न नसक्ने बताएका छन् ।
पेरेजले प्रधानमन्त्री र राष्ट्रपतिका रूपमा सन् २००७ देखि २०१४ सम्म इजरायलको नेतृत्व गरेका थिए ।
प्रतिक्रिया दिनुहोस !
