गोर्खाल्यान्ड माग गर्दै बन्द
दार्जीलिङः पश्चिम बंगाल सरकारले दमनको नीति अघि सारेको भन्दै गोरखा जनमुक्ति मोर्चाले बुधबार आह्वान गरेको बन्दले दार्जीलिङ सुनसान बनेको छ । स्वाभिमानी, जातिप्रेमी पहाडवासीको सहासिक योगदानका कारण बन्द सफल भएको मोर्चाले जनाएको छ ।
पश्चिम बंगाल सरकारले बन्द असफल पार्न दबाव दिए पनि सरकारी कर्मचारी र व्यवसायीको सहयोगका कारण बन्द सफल भएको मोर्चाका अध्यक्ष विमल गुरुङले बताए ।
बंगाल सरकारको चेतावनी झेलेर पनि आफ्नो जाति अनि पहाडको स्वाभिमानको खातिर बुधबार होटेल व्यवसायी, व्यापारी वर्ग अनि वाहन सेवासित सम्बन्धित कर्मचारीहरूले बन्दको समर्थन गरेपछि सफल भएको अध्यक्ष गुरुङले बताए ।
गुरुङका अनुसार व्यावसायिक लाइसेन्स क्यान्सिल गर्ने, रोडपर्मिट क्यान्सिल गर्ने जस्ता तानाशाहीपूर्ण चेतावनी बंगाल सरकारले जारी गरे पनि गोर्खाहरूले बंगालको तानाशाही नीति अनि अतिक्रमणको उचित जवाफ दिएका छन् ।
उनले बन्दको सफलताले पहाडवासीका तर्फबाट गोर्खाल्यान्डको माग र गोरखालीको एकतालाई हजार षड्यन्त्रपूर्ण प्रयत्नहरूले तोड्न नसकिने बंगाल सरकार अनि मुख्यमन्त्री ममता बनर्जीलाई बन्दले जवाफ दिएको टिप्पणी गरे । अध्यक्ष गुरुङले गोर्खा ल्यान्डभन्दा तल्लो स्तरको सहमति नमान्ने बताएका छन् । तस्बिर ः बन्द दार्जीलिङ ।
प्रतिक्रिया दिनुहोस !
