मनकामना मन्दिरमा राष्ट्रपतिले १० मिनेट पूजा गरिन्

गोरखाः राष्ट्रपति विद्यादेवी भण्डारीले बिहीबार प्रसिद्ध धार्मिकस्थल मनकामनाको दर्शन गरेकी छन् । पोखराबाट नेपाली सेनाको हेलिकोप्टरबाट साढे दुई बजे राष्ट्रपति भण्डारी मनकामना आइपुगेकी थिइन् ।

उनले १० मिनेट लगाएर देवीको पूजाअर्चना गरेकी छिन् । जीर्णोद्वारको क्रममा रहेको मन्दिरको भत्काइएको भागको विशेष पूजाकोठामा नै उनले पूजाआजा गरेकी हुन् ।

जीर्णोद्वार हुन थालेपछि सर्वसाधारण भक्तजनका लागि भने बाहिरै देवीको मूर्ति प्रतिस्थापन गरी पूजा गर्ने व्यवस्था मिलाइएको छ ।
पूजा सकेर भण्डारीले मन्दिर परिसरमा मनकामना क्षेत्र विकास समिति, मनकामना जीर्णोद्धार समिति, स्थानीयबासी तथा जिल्लाका प्रशासकसंग भेटघाट गरिन् ।

छलफलको क्रममा उनले मनकामना मन्दिरको जीर्णोद्वारका लागि बजेट अभाव हुन नदिने बताइन् । मनकामना मन्दिर बिगत एक बर्षदेखि जीर्णोद्वारको क्रममा छ । ‘भूकम्पले ध्वस्त महत्वपूर्ण धार्मिक तथा एतिहासिक सम्पदा पुनर्निर्माणमा रकम अभाव हुन नदिन मैले आफ्नो क्षेत्रबाट पनि पहल कदमी गर्छु’ उनले भनिन् ‘यो मन्दिर पहिले पनि यसै जीर्ण थियो । भूकम्पले झन तहस नहस बनाएको छ ।’

राष्ट्रपति समक्ष मनकामना गाविसका सचिव नारायण सापकोटाले गाविसका समस्या सुनाए । ‘मनकामना मन्दिर दर्शन गर्नका लागि वार्षिक १२ लाख तिर्थालु आउने गर्छन् । उनीहरुलाई व्यवस्थापन गर्न समस्या छ’ सचिव सापकोटाले राष्ट्रपतिसमक्ष भने ‘खानेपानीको पर्याप्त व्यवस्था गर्न सकेका छैनौँ।’

जीर्णाेद्धारको क्रममा रहेको मनकामना मन्दिर २०७४ सालमा पुननिर्माण गरिसक्ने लक्ष्यकासाथ काम भइरहेको मन्दिर जिर्णाेद्धार समितिका अध्यक्ष नरेन्द्रबाबु श्रेष्ठले जानकारी दिए । २०६८ सालमा नेपाल सरकार पुरातत्व विभागबाट भएको सर्भेमा आठ करोड ५० लाख लाग्ने अनुमान गरिएको थियो । भूकम्प र नाकाबन्दीका कारण काम प्रभावित हुँदा मन्दिर निर्माणको लागत बढेर ११ करोड रुपैँया पुग्ने अनुमान गरिएको श्रेष्ठले बताए ।

नेपाल सरकारले ४ करोड रुपैँया मनकामना जीर्णाद्धारका लागि उपलब्ध गराइसकेको छ । सोही चार करोड मध्येबाट तीन करोड ५० लाख रुपैँयाले जिर्णाद्धार समितिले साँढे सात किलो सुन किनेर लकरमा राखेको छ । भक्तजन र स्थानीयको सहभागितामा करिब ६ करोड रुपैँया संकलन भइसकेकोले मन्दिर निर्माणका लागि रकम अभाव भने नहुने मन्दिर जिर्णोद्धार समितिले राष्ट्रपतिसमक्ष अबगत गराएको छ ।

अझै डेढ किलो सुन र छाना छाउनका लागि तामाको पाता ब्यवस्था गर्नै बाँकी रहेको भन्दै सहयोगका लागि अनुरोध गरेको छ । अहिलेसम्म करिब दुई करोड रुपैँया खर्च भइसकेको समेत अध्यक्ष श्रेष्ठले बताए । उनका अनुसार नेपाल सरकारले ३५ प्रतिशत र भक्तजन तथा स्थानीयको जनसहभागितामा ६५ प्रतिशत रकम संकलन भएको छ ।

राष्ट्रपति भण्डारी करिब एक घण्टा मनकामनामा बसेर काठमाडौँ फर्किएकी छिन् ।