टिकट नपाउँदा कर्णालीवासी नेपालगन्जमा अलपत्र 

नेपालगन्जः दसैंमा घर जान हवाई टिकट नपाएपछि कर्णालीका बासिन्दा नेपालगन्जमा अलपत्र परेका छन् ।

हवाई टिकटका लागि मन्त्रीदेखि सचिवसम्मले सोर्सफोर्स लगाउन थालेका छन् । हवाई टिकटको मारामार भएपछि मन्त्रीसम्मको यस्तो दबाब आउन थालेको हो । टिकटका लागि लामो समय नेपाल वायुसेवा निगमको कार्यालय धाइरहेको डोल्पाका विद्यार्थी कुमार पुनमगरले बताए ।

‘एक सातादेखि टिकटका लागि धाइरहेको छु तर टिकट छैनमात्र भन्छन्', पुनमगरले भने । पोखराको पृथ्वीनारायण क्याम्पसमा पढ्ने पुनमगर दसैंमा घर जान भनेर एक साताअघि पोखराबाट नेपालगन्ज आएका हुन् । ‘होटेलमा बस्दा पैसा सकिसक्यो । टिकट पाइँदैन, अब के गर्ने ? ' उनले भने, ‘काउन्टर खुल्न नपाउँदै टिकट सकियो भन्छन् ।'

नेपालगन्जस्थित जेभीएन उच्च माविमा कक्षा १२ मा अध्ययनरत डोल्पाकी सरिता पुनले पनि टिकट पाएकी छैनन् । ‘टिकट काट्न आयो, सक्किसक्यो भन्ने उत्तर आउँछ', सरिताले भनिन्, ‘दसैं मनाउन घर जान पनि नपाइएलाजस्तो छ ।'

अलपत्र परेकी डोल्पाकै निर्मला गुरुङले भनिन्, ‘२ साता भयो, उडान नै भएको छैन । कसरी घर जाने होला ? डोल्पासम्म न गाडी जान्छ न घोडा नै, न त प्लेनको टिकट नै पाइन्छ ।'

कर्णालीका हुम्ला, मुगु र डोल्पाका लागि हवाईजहाजको विकल्प छैन । जुम्ला भने स्थलमार्गबाट समेत जान सकिन्छ ।

टिकट काटेरसमेत उड्न नपाएकाको गुनासो बेग्लै छ । कर्णालीका हुम्ला, मुगु र डोल्पाका लागि हवाईजहाजको विकल्प छैन । जुम्ला भने स्थलमार्गबाट समेत जान सकिन्छ ।

नेपाल वायुसेवा निगम क्षेत्रीय कार्यालय नेपालगन्जका प्रमुख किरण श्रेष्ठले एउटा मात्रै जहाजले दसैंभरि उडान भर्नुपर्ने बाध्यता भएकाले कर्णालीमा नियमित उडान गर्न नसक्दा समस्या भएको बताए । उनले भने, ‘वायुसेवा निगमसँग एउटा मात्रै जहाज छ । यसले देशभर उडान गर्नुपर्छ । एउटाले कहाँ मात्रै भ्याउने ? '

 

उनले तालिकाअनुसार उडान गर्न पाए दसैंमा पनि समस्या नहुने दाबी गरे । हुम्लामा सातामा ३ पटक, डोल्पा, बाजुरा, जुम्ला, मुगुको तल्चामा २/२ पटक उडान भर्नुपर्ने हवाईतालिका छ ।

टिकटका लागि मन्त्रीदेखि सचिवसम्मको सोर्स आउने गरेका कारण समस्या हुने गरेको निगम स्रोतले जनाएको छ । निगमका एक कर्मचारीले भने, ‘सचिवदेखि मन्त्रीसम्मको सोर्स आउँछ । उनीहरूलाई दिने कि सर्वसाधरण यात्रुलाई, गाह्रो छ ।'

१४ जना यात्रु अट्ने सानो जहाजमा १० वटा टिकट यात्रुका लागि खुला गरिएको छ । २ वटा सिट सरकारी कार्मचारी र २ वटा सिट पर्यटकका लागि छुट्ट्याइएको निगमका क्षेत्रीय प्रमुख श्रेष्ठले भने । उनले एक सातापछि अर्को जहाज आएमा हवाई टिकट पाउन केही सहज हुने बताए ।