एकाधिकार तोडिएपछि यातायात ठप्प

विदुरः पासाङल्हामु यातायात सेवा समितिले नुवाकोट र रसुवामा एकाधिकार तोडिएको विरोधमा शुक्रबार नुवाकोट र रसुवामा यातायात ठप्प बनाएको छ । नुवाकोट र रसुवामा ३२ वर्षदेखि एकलौटी बस सेवा सञ्चालन गर्दै आएको समितिको एकाधिकार तोड्दै एक महिनादेखि छुट्टै बस सञ्चालन गरिएको विरोधमा पासाङल्हामुका बस सञ्चालक विरोधमा उत्रिएका हुन् ।

बिहानैदेखि पासाङल्हामु यातायात सेवा समितिका एक सय ५० भन्दा धेरै बस सदरमुकाम विदुरसहित आसपासका सडकमा बस तेस्र्याएर अवरोध गरिरहेका थिए । काठमाडौंबाट नुवाकोट तथा रसुवाबाट काठमाडौंका लागि हिँडेका बस प्रहरीले सुरक्षा दिन नसक्ने जनाएपछि बीचबाटोमै रोकिएका छन् ।

पासाङल्हामु मार्ग, देवीघाट-गल्छी सडकमार्ग तथा छहरे-टोखा सडकका विभिन्न स्थानमा अन्य यातायातका साधन सञ्चालन गर्नै नसकिने गरी पासाङल्हामु यातायात सेवा समितिको अवरोधलाई प्रहरी तथा स्थानीय प्रशासनले हटाउन पहल नगरेको गेर्खुका डा. उद्धव प्याकुरेलले बताए ।

काठमाडौंबाट पारिवारिक कामका लागि घर फर्कन बालाजु टिकट काउन्टर पुगेका प्याकुरेल बसको टिकट नपाएपछि भाडाको ट्याक्सी लिएर नुवाकोटको विदुरसम्म पुगेका थिए ।

पासाङल्हामु यातायात सेवा समितिले ढुंगे, त्रिशूली, बट्टार र पीपलटार क्षेत्रमा बसहरू लाम लगाएर राखेको छ । सडकमार्ग अवरुद्ध हुने गरी बस तेस्र्याएपछि एम्बुलेन्स, व्यक्तिगत सवारीसाधन, भाडाका र अन्य मालवाहक गाडीसमेत आवतजावत गर्न समस्या भएको छ ।

पासाङल्हामु यातायात सेवा समितिले ढुंगे, त्रिशूली, बट्टार र पीपलटार क्षेत्रमा बसहरू लाम लगाएर राखेको छ । सडकमार्ग अवरुद्ध हुने गरी बस तेस्र्याएपछि एम्बुलेन्स, व्यक्तिगत सवारीसाधन, भाडाका र अन्य मालवाहक गाडीसमेत आवतजावत गर्न समस्या भएको बट्टारका व्यापारी दीपक कायस्थले बताए ।

पासाङल्हामु यातायात सेवा समितिका अध्यक्ष कुलबहादुर खड्गीले नयाँ बस सेवा सञ्चालनको अनुमति लिएको केरुङ यातायातले केही पुराना बससमेत सञ्चालन गरेकाले विरोधमा उत्रनुपरेको बताए । केरुङ यातायात प्रालिका अध्यक्ष किरण रिजालले पासाङल्हामुले एकाधिकार तोडिएको विरोधमा यात्रा गर्न पाउने सर्वसाधारणको अधिकारमाथि प्रहार गरेको बताए ।

केरुङ यातायात समितिले भने आफ्नो सेवालाई निरन्तरता दिइरहेको नुवाकोट प्रतिनिधि राज बोगटीले बताए । जिल्लाका सुरक्षा निकायलाई आवश्यक सहयोगका लागि आग्रह गरिएकाले आफ्नो समितिका बसले नियमित सेवा दिने उनले बताए ।

बर्सौंदेखि पुराना गाडी सञ्चालन गर्दै आएको पासाङल्हामुको एकाधिकार तोड्दै नयाँ डिलक्स बस सञ्चालनपछि पासाङल्हामु विरोधमा उत्रिएको यात्रुको गुनासो छ । यात्रुले सुविधा सम्पन्न बसमा सुरक्षित यात्रा गर्ने अवसरलाई चुनौती दिँदै पुरानै बसमा यात्रु कोच्न पाउनुपर्ने मान्यता बोकेका कारण यात्रुले हैरानी बेहोर्नु परेको देवीघाटका व्यापारी मीनप्रसाद पुडासैनीले बताए ।

जिल्ला प्रशासन कार्यालय नुवाकोटले भने सडक मार्ग खुलाउने प्रयास भइरहेको जनाएको छ । पासाङल्हामु यातायात सेवा समितिका कर्मचारी तथा समितिका व्यक्तिले भने एम्बुलेन्स नै नछिर्ने गरी सडकमार्ग अवरुद्ध गरिएपछि हटाउन सुरु गरिएको जिल्ला प्रहरी कार्यालय नुवाकोटका प्रमुख प्रहरी उपरीक्षक देवबहादुर बोहोराले बताए ।

प्रमुख जिल्ला अधिकारी विष्णुप्रसाद पोखरेलले सडक अवरुद्ध पारेर विरोध गर्ने अधिकार कसैसँग नभएकाले अन्य सवारीसाधनलाई गन्तव्यतर्फ पठाउन प्रशासन प्रतिबद्ध रहेको बताए । उनले निर्वाध रूपमा यातायात सञ्चालन गर्न सम्बन्धित निकायलाई निर्देशन दिए पनि अवरोध भने हटाइएको छैन ।