भारत र पाकिस्तानबीच तनाव बढेपछि भारतमा पाकिस्तानी कलाकारमाथि प्रतिबन्ध लगाइएको छ । यसको बदलास्वरूप पाकिस्तानका चलचित्रघरका सञ्चालकले भारतीय चलचित्र प्रदर्शनमा रोक लगाएका छन् ।
गत साता उरीमा भएको आतंकवादी आक्रमण र बिहीबार भारत-पाकिस्तानबीच गोलाबारी भएपछि भारतले पाकिस्तानी कलाकारमाथि प्रतिबन्ध लगाएको हो भने पाकिस्तानमा पनि भारतीय चलचित्र प्रदर्शनमा प्रतिबन्ध लगाइएको समाचार एजेन्सीहरूले दिएका छन् ।
भारतीय फिल्म निर्माता संघले पाकिस्तान र भारतबीचको तनावलाई सम्बोधन गर्दै पाकिस्तानी कलाकारमाथि प्रतिबन्ध लगाइएको जनाएको छ । संघले आफ्नो ८७औं सम्मेलनमा पाकिस्तानी कुनै पनि कलाकारलाई सहभागी नगराउने निर्णय गरेको छ । संघले अवस्था नसुध्रिएसम्म पाकिस्तानी कलाकारलाई चलचित्रमा समेत काम गर्न नदिने प्रस्ताव पारित गरेको छ ।
भारतमा कार्यरत सबै पाकिस्तानी कलाकारलाई प्रतिबन्ध लगाइएको घोषणा गरेपछि पाकिस्तानी हलका मालिकले 'स्थिति पूर्ण रूपमा नियन्त्रणमा नआएसम्म हामी भारतीय फिल्म देखाउन बन्द गर्नेछौं । शुक्रबारदेखि कुनै पनि भारतीय फिल्म मेरो सिनेमाघरमा पक्कै पनि चल्नेछैन' भन्दै बयान दिएको दी एक्सप्रेस ट्रिब्युनले प्रकाशित गरेको छ ।
भारतको महाराष्ट्र नवनिगम सेना (एमएनएस)का कार्यकर्ताले पाकिस्तानी कलाकारलाई भारत छोड्न ४८ घन्टे अल्टिमेटम दिइसकेका छन् । भारतीय फिल्म कर्मचारी संघले विज्ञप्ति निकालेर यो विषयलाई गम्भीरताका साथ नलिए गम्भीर नतिजा सामना गर्नुपर्ने चेतावनीसमेत पाकिस्तानी कलाकारलाई दिएका थिए । पाकिस्तान सरकारले यसबारे आधिकारिक धारणा भने सार्वजनिक नगरेको सञ्चारमाध्यमले जनाएका छन् ।
पाकिस्तानका लोकप्रिय गायक अतिफ असलमले भारतको हरियाणामा अक्टोबर १५ मा गर्ने भनिएको कन्सर्ट रद्द गरिएको छ । पाकिस्तानमा यसअघि फिल्म 'पिंक' र 'बान्जो' रिलिज भए पनि यो हप्ता 'एमएस धोनी: द अनटोल्ड स्टोरी' फिल्म रिलिज हुने तय गरिए पनि चलचित्रमा पाकिस्तानविरोधी तत्त्व हुनसक्ने भन्दै प्रदर्शनमा रोक लगाइएको छ । एजेन्सी
प्रतिक्रिया दिनुहोस !
