सन्नाटाको गीत

पूर्वबाट सुनसानले हमला गरिरहेछ
पश्चिमबाट मौनताले घेरा हालिरहेछ
एकलासले उत्तरबाट हस्तक्षेप बढाइरहेछ
र चकमन्नताले दक्षिणबाट सीमा सारिरहेछ
चारै दिशाबाट घेरिरहेका छनसन्नाटाका यी अनेक रूपहरूले
कोरस डाउन हुँदैछ अचानक
भोल्युम घटाएको स्पिकरझैं
भोकलिस्टको गला स्याँ-स्याँ गर्न थालेको छ
ब्याट्री सकिएको पुराना रेडियोझैं
कुराकानीहरू कानेखुसीमा फेरिँदै छननाराहरूले गर्न थालेका छन् मौनधारण
विरोध सभाको वक्ता
माइक्रो फोनमा सुस्केरा काडिरहेको छ
छापामार दस्ताको कमान्डर
आँखा चिम्लेर अनुलोम-विलोम गरिरहेको छ
हर्न नबजाई आइरहेछ द्रुत गतिमा रेलगाडी
शंख नबजाई लगिँदैछन् हतारहतार मुर्दाहरू
चारै दिशामा फैलिरहेका छनसन्नाटाका यी अनेक आयामहरू
लयको मुखमा रुमाल कोचिएको छ
र, पट्टी बाँधिएको छ सुरको आँखामा
नृत्यका खुट्टाहरू ठिंग्रामा हालिएका छनर वाद्ययन्त्रका हातमा लगाइएको छ सिक्री
गीत गिरफ्तारीमा परेको छ
र आवाज बेपत्ता बनाइएको छ
प्रिय श्रोताहरू ! संकटको घडीमा
प्रतीक्षा गरेर नबस्नुहोस् कुनै मधुर संगीतको
यो मौनता तोड्ने पालो अब तपाईंहरूकै हो
चिच्याउनुहोस् एकपटक जोडले
च्याँट्ठिनुहोस् एकपटक आक्रोशले
चिच्याउनुहोस् र भन्नुहोस्-
कोर्रा खाइरहेको बन्दी चिच्याउन छाड्यो भने के हुन्छ ?
च्याँट्ठिनुहोस् र भन्नुहोस्-
भोकभोकै छाडिएको बच्चा च्याँट्ठिन छाड्यो भने के हुन्छ ?