काठमाडौँमा ‘घाटमान्डु’
काठमाडौँः घटस्थापनाको दिन काठमाडौंमा भने ‘घाटमान्डु’को चर्चा चल्यो । घाटमान्डु उत्सव भनिएको कार्यक्रममा एउटै लेखकका कविता र छोटा आख्यानात्मक लेखनहरू वाचन भए । प्रसंग थियो, लेखक कुमार नगरकोटीको नयाँ पुस्तक ‘घाटमान्डु’ विमोचनको ।
शिल्पी थिएटरमा शनिबार आयोजित घाटमान्डु उत्सवमा विभिन्न क्षेत्रका पाँच हस्तीले ‘घाटमान्डु’ विमोचन गरे । फिल्म निर्देशक नवीन सुब्बा, संगीतकार आभास, चित्रकार एरिना ताम्राकार, नाटक कलाकार सरिता गिरी र फोटोपत्रकार कुमार आलेले संयुक्त रूपमा पुस्तक विमोचन गरेका थिए ।
विमोचनपूर्व पुस्तकबारे पत्रकार वसन्त बस्नेत र लेखक कुमार नगरकोटीले छलफल तथा पुस्तकभित्रका रचना वाचन गरेका थिए । उनीहरूलाई कवि विप्लव प्रतीक, चन्द्रवीर तुम्बापो र नगरकोटीका लिटरेरी एजेन्ट राजन गोदारले घाटमान्डुबाट एक÷एक कविता वाचन गरेका थिए । कविता वाचन गर्दै प्रतीकले धेरै वर्षपछि अरूले लेखेको कविता पढेर सम्मोहित भएको टिप्पणी गरे ।
लेखक नगरकोटीले आफ्नो नयाँ किताबमा विभिन्न विधाका रचना समेटिएको बताउँदै आफू कलाको पारखी भएको बताए । ‘जनजीवनमा भेटिने विभिन्न दृश्यबाट शैली र कला चोरेको छु’, नगरकोटीले भने ।
घाटमान्डु उनको छैटौं पुस्तक हो । ‘फिक्सन, नन–फिक्सन एन्ड अदर एडिक्सन’ नाम दिइएको यो पुस्तकमा कथा, निबन्ध, संस्मरणसँगै एडिक्सन शीर्षकमा चित्रात्मक कविता तथा ससाना बेग्लै विधाका रचनाहरू समेटिएको पुस्तकको प्रकाशन संस्था बुक हिलका भूपेन्द्र खड्काले बताए ।
‘घाटमान्डुमा नगरकोटीका केही प्रकाशित निबन्ध, अप्रकाशित कथाहरूसँगै हिन्दी र नेपाली कविता एवं केही विज्ञापन र सूचनाहरू पढ्न पाइनेछ’, खड्काले भने । नगरकोटीका यसअघि ‘मोक्षान्त फिभर काठमाडौं’, ‘फोसिल’, ‘अक्षरगन्ज’, ‘कोमा’ र ‘मिस्टिका’ प्रकाशित छन् ।
प्रतिक्रिया दिनुहोस !
