बिर्तामोड: बिर्तामोडका जयनारायण ढुंगानाले पूर्वपश्चिम राजमार्गमा पर्ने बिर्तामोड भएर बग्ने अन्दुवा खोलामा मान्छे हिँड्ने फलामको पुल निर्माण गरेका छन् । बिर्तामोडको कन्काई एजुकेसन फाउन्डेसनका अध्यक्षसमेत रहेका उनले सवारीसाधनले मान्छेलाई ठक्कर दिन नपाओस् भनेर पुल निर्माण गरेको बताएका छन् ।
उक्त पुल शनिबारबाट सञ्चालनमा आएको छ । ढुंगानाले उक्त पुलको निर्माण गरी रङरोगनको समेत जिम्मा लिएका छन् । पुल सुरक्षाको जिम्मा जिल्ला ट्राफिक प्रहरी कार्यालय झापाले लिएको छ । पुलको लागत भने पुल निर्माताले खुलाउन चाहेनन् । उनले भने, 'मैले समाजका लागि गरेको हुँ । यसबाट मैले आम्दानी लिने नभएपछि यसको लागत खुलाइरहनुपर्छ भन्ने लाग्दैन ।'
पूर्वको मुख्य व्यापारिक सहर बिर्तामोडमा दिनप्रतिदिन जनघनत्व बढिरहेको छ । सवारीसाधन गुड्ने अन्दुवा खोलामा बनेको पक्की पुल सानो र जीर्ण भइसकेको भए पनि ठेलमठेल गर्दै पैदल यात्रुदेखि साइकल, मोटरसाइकल, सिटी रिक्सालगायत सबैखाले यातायातका साधन गुड्ने गर्छन् । दिनहुँ उक्त पुलमा कुनै न कुनै दुर्घटना हुने गरेको ट्राफिक प्रहरीको रेकर्ड छ ।
ढुंगानाले उक्त पुलको विकल्पका रूपमा फलामे पुल निर्माण हुन् । पुलको क्षेत्रफल ४ फुट चौडाइ र ५७ फुट लम्बाइ छ भने रेलिङ लगाएर यात्रुको सुरक्षा प्रबन्ध मिलाइएको छ । पक्की पुलमा खाँदाखाँद सवारीसाधन र पैदल यात्रु हिँड्दा धेरै दुर्घटना हुन थालेपछि पुल बनाउने इच्छा जागेको ढुंगानाले बताए ।
पुल सञ्चालनमा आएपछि पैदल तथा साइकलयात्रीलाई आवतजावत गर्न सहज भएको स्थानीयले बताए । जिल्ला ट्राफिक प्रहरी कार्यालय झापाका प्रमुख ढुण्डीराज गिरीले अब पुलमा पैदलयात्रीलाई सवारीसाधनले ठक्कर दिने क्रम घट्ने बताए ।
ढुंगानाले बिर्तामोडको ट्राफिक कार्यालय छेउमा दुर्गा मन्दिर, कनकाईमाईमा मलामी वि श्रामस्थल, शौचालय, विभिन्न विद्यालयको निर्माणसमेत गरिसकेका छन् भने विभिन्न विद्यालय तथा क्याम्पस सञ्चालनका लागि आर्थिक सहयोग प्रदान गर्दै आएका छन् ।
प्रतिक्रिया दिनुहोस !
