परवेज मुसर्रफ भन्छन्-पाकिस्तानी सेनाले भारतमाथि जवाफी कारबाही गर्नुपर्छ
वासिङटन: पाकिस्तानी सेनाका पूर्व राष्ट्रपति एवं सेना प्रमुख परवेज मुसर्रफले पाकिस्तानी सेनाले भारतमाथि जवाफी कारबाही गर्नुपर्ने बताएका छन् ।
वासिङटन आइडियाज फोरममा बोल्दै पाकिस्तानका पूर्वराष्ट्रपति मुसर्रफले भने, ‘म भएको भए भारतलाई जवाफी कारबाही गरिसक्थें ।’ ७३ वर्षीय मुसर्रफले उरीमा आक्रमणपछि देखिएका घटनामा पाकिस्तानले जवाफ दिनुपर्ने स्पष्ट पारेका छन् ।
भारतले कुनै पनि बेला आक्रमण गर्ने डरले चुप लागेर बस्नु पाकिस्तानको पक्षमा नभएको उनको भड्काउपूर्ण भनाइ थियो । उनले पाकिस्तानका प्रधानमन्त्री, रक्षामन्त्री, सेनापति, सबैले यो गम्भीर अवस्था हो भनेर स्वीकार गरे पनि उनीहरू मौन बसेका छन् भन्दै आलोचना गरे ।
पूर्वराष्ट्रपतिले प्रश्न गरे, ‘पाकिस्तानले यस्तो अवस्थामा के गर्छ ? आफूले चाहेको बेला चाहेको ठाउँमा आक्रमण गर्न सक्ने भन्दै पाकिस्तानी अधिकारी बोल्छन् मात्रै ।’ यस्ता भनाइले द्वन्द्वको सम्भावना मात्र बढाउने उनको भनाइ थियो ।
यस्तो भनेर बोल्नु मात्रै उचित नभएको मुसर्रफको दाबी थियो । भारतमा युद्धको उन्माद चढेको आरोप लगाउँदै उसले सधैं यस्तो गर्ने गरेको दाबी गरे । भारतका यस्ता गतिविधिप्रति जवाफ दिनुपर्ने उनको कथन छ ।
प्रतिक्रिया दिनुहोस !
