पशु चोरी हुन थालेपछि गोठमै ओछ्यान
इटहरी: दसैं सुरु भएसँगै पूर्वी नेपालका सीमावर्ती गाविसमा असुरक्षा बढेको छ । भारतीय सिमाना जोडिएका गाविसहरूमा चोरी, डकैती र तस्करीका घटना बढ्न थालेपछि स्थानीय बासिन्दा असुरक्षित महसुस गर्न थालेका हुन् ।
सीमा क्षेत्र सुरक्षाको जिम्मा लिएको सशस्त्र प्रहरीले समेत नियमित गस्ती गर्न छाडेपछि भारतीय सिमाना जोडिएका गाविसमा शान्ति सुरक्षा कमजोर बनेको स्थानीय बासिन्दाले बताए । पूर्वका सुनसरी, मोरङ, झापा, सप्तरी र सिराहाका सीमावर्ती गाविस निरीक्षण गर्न गएको राष्ट्रिय मानवअधिकार अगोगका सदस्यहरू गोविन्द शर्मा र मोहना अन्सारी नेतृत्वको टोलीसँग स्थानीय बासिन्दाले सीमा क्षेत्रमा सुरक्षा नभएको भन्दै ध्यानाकर्षण गराएका थिए ।
भारतीय डाँकाको समूहले चोरीडकैती गर्न थालेपछि सीमा क्षेत्रका बासिन्दा रातभर जाग्राम बस्न थालेको सुनसरी भान्टाबारीका लक्ष्मी यादवले बताए । उनले आयोगको टोलीसमक्ष सीमा क्षेत्रमा गाई, भैंसी, बाख्रा, खसी र धनमाल चोरी हुने डरले गाउँले गोठमा नै ओछ्यान लगाएर सुत्न थालेको बताए ।
सीमा क्षेत्रको शान्तिसुरक्षा र यहाँका सर्वसाधारणको अवस्थाबारे जानकारी लिन सप्तरी पुगेको आयोगको टोलीसमक्ष स्थानीयले प्रहरीको कामकारबाही चित्तबुझ्दो नभएको गुनासो गरेका थिए । आयोगको टोलीले सप्तरीका एसपी भीम ढकाललाई भेटेर जिल्लाको शान्तिसुरक्षाको अवस्थाबारे जानकारी लिएको थियो ।
आयोगका सदस्य शर्माले सीमा क्षेत्रका सर्वसाधारणले शान्तिसुरक्षा कमजोर भएको गुनासो गरेकाले भरपर्दो सुरक्षा व्यवस्था मिलाउन सरकारसमक्ष आग्रह गर्ने बताए ।
आयोगकी प्रवक्ता अन्सारीले पूर्वी तराईका जिल्लामा भएका मानवअधिकार उल्लंघन घटनाका दोषीलाई कारबाही नगर्दा दण्डहीनता बढेको भन्दै दोषीलाई कारबाही गर्न सरकारको ध्यानाकर्षण गराउने बताइन् । उनले सीमा क्षेत्रमा हराएका सीमास्तम्भ खोजी नगरिएको पाइएको बताइन् ।
आयोगका पूर्वाञ्चल प्रमुख झंकार रावलले झापाको खुदुनाबारीमा भारतीय हात्तीको आतंक र अन्य सीमा क्षेत्रमा चोरी, डकैती र तस्करीका घटनाले गर्दा सर्वसाधारण त्रसित भएको पाइएको बताए । उनले बाढीका कारण विस्थापित भएका पीडित परिवारलाई सरकारले राहत उपलब्ध नगराएको र बाढी प्रभावित क्षेत्रका सर्वसाधारणले शान्तिको अनुभूति गर्न नसकेको बताए ।
सशस्त्र प्रहरी बल पूर्वाञ्चल बाहिनीका प्रमुख सशस्त्र प्रहरी नायब महानिरीक्षक सुरज श्रेष्ठले पूर्वका विभिन्न जिल्लाका सीमावर्ती ५५ स्थानमा पोस्ट स्थापना गरी अपराध नियन्त्रण गर्ने काम भइरहेको बताए । उनले पर्याप्त जनशक्ति अभावका कारण सीमा क्षेत्रमा हुने अपराध नियन्त्रणमा समस्या भएको बताए ।
प्रतिक्रिया दिनुहोस !
