बिजुक्छे र विप्लव पहिलोपटक आमनेसामने
भक्तपुरः नेपाल मजदुर किसान पार्टीका अध्यक्ष नारायणमान बिजुक्छे (रोहित) र नेत्रविक्रम चन्द (विप्लव) बीच मंगलबार भक्तपुरमा भेटवार्ता भएको छ ।
नेकपा माओवादीका महासचिव विप्लव मंगलबार आफ्ना सीमित नेतासहित भक्तपुरको कमलविनायकस्थित बिजुक्छे निवास पुगेका हुन् । भेट आपसी चिनापर्ची र देशको वर्तमान राजनीतिक अवस्थाबारे समीक्षामा सीमित रहेको नेमकिपाका अध्यक्ष बिजुक्छेले बताए।
उनले नेता विप्लवसँग मंगलबारमात्रै आफ्नो पहिलोपटक आमनेसामने भेट भएको जानकारी दिए । ‘भेटमा आपसी चिनापर्ची र वर्तमान राजनीतिक अवस्थाबारे समीक्षा गरियो’, अध्यक्ष बिजुक्छेले अन्नपूर्णसँग भने, ‘विप्लवसँग मेरो पहिलो फेस टु फेस भेटघाट भएकाले धेरै कुरा भएन । देशको वर्तमान अवस्थाबारे हाम्रो धारणा समान रह्यो ।’
अध्यक्ष बिजुक्छेका अनुसार भेटमा प्रधानमन्त्री प्रचण्डले भारतसँगको २५ बुँदे सहमति जनाएर नेपाललाई भूटानको कोटीमा पु¥याएकोबारे दुई नेताबीच समान धारणा बनेको थियो ।
त्यस्तै नेकपा–माओवादीका महासचिव विप्लवले नेमकिपाले व्यवस्थापिका–संसदमा निभाएको भूमिकाको प्रशंसा गरेका थिए । उनले व्यवस्थापिका–संसदमा नेमकिपाको उपस्थितिले आफूहरुलाई गौरवान्वित महसुस गराएको जानकारी गराएका थिए ।
‘उहाँ (विप्लव) ले व्यवस्थापिका–संसदमा हामीले निभाएको भूमिकाको प्रशंसा (एप्रिसियट) गर्नुभयो’, अध्यक्ष बिजुक्छेले भने, ‘नेमकिपाबाट आफूहरुले सिकिरहेको जानकारी दिनुभयो ।’
भेटमा नेमकिपाका अध्यक्ष बिजुक्छेसँगै पार्टी केन्द्रीय सचिव सुनिल प्रजापति र नेकपा–माओवादीका महासचिव विप्लवसँगै पार्टी प्रवक्ता खड्गबहादुर विश्वकर्मा प्रकाण्डलगायत सहभागी थिए ।
नेमकिपाका अध्यक्ष बिजुक्छेसँग यसअघि क्रान्तिकारी माओवादी पार्टीका उपाध्यक्ष सीपी गजुरेलले पनि भेटवार्ता गरेका थिए ।
प्रतिक्रिया दिनुहोस !
