भारतीय राष्ट्रपति जनकपुर, पोखरा र लुम्बिनी जाने
![भारतीय राष्ट्रपति जनकपुर, पोखरा र लुम्बिनी जाने](https://annapurnapost.prixacdn.net/media/albums/Pranab-Mukharji-57f5ad90a113d0.06264276_rOZaily76T.jpg)
काठमाडौं: भारतीय राष्ट्रपति प्रणव मुखर्जीले नेपाल भ्रमणमा जनकपुर, पोखरा र लुम्बिनी पनि जाने भएका छन् ।मुखर्जी कात्तिक १७ देखि तीनदिने राजकीय भ्रमणमा नेपाल आउने तय भएको परराष्ट्रमन्त्री डा. प्रकाशशरण महतले बताए ।
मन्त्री महतका अनुसार भारतीय राष्ट्रपति कात्तिक १७ अपराह्न नेपाल आइपुग्नेछन् । मुखर्जीले एक रात पोखरामा बिताउने र त्यसपछि जनकपुर, पोखरा र लुम्बिनी भ्रमण गर्ने कार्यक्रम तयार भएको उनले बताए ।
यसैबीच नेपालका लागि भारतीय राजदूत रन्जित रेले पछिल्लो समय दुवैतर्फबाट भएका उच्चस्तरीय द्विपक्षीय भ्रमणले नेपाल-भारत सम्बन्ध नयाँ उचाइमा पुगेको बताएका छन् ।
रिपोर्टर्स क्लबले बुधबार राजधानीमा आयोजना गरेको साक्षात्कारमा राजदूत रेले पछिल्लो समय द्विपक्षीय उच्चस्तरीय भ्रमणले नेपाल-भारत सम्बन्धमा नयाँ आयाम थपेको बताए ।
'भाइटीकालगत्तै भारतीय राष्ट्रपतिको नेपाल भ्रमण हुने, नयाँदिल्लीमा नेपाल-भारत प्रबुद्ध समूहको बैठक सम्पन्न भएको छ । सबै उच्चस्तरीय भ्रमणले दुवै देशमा शान्ति, स्थायित्व र विकासमा टेवा पुर्याउँछ । दुवै देशले सम्बन्धलाई उच्च प्राथमिकता दिएको छ', उनले भने ।
२१ औं शताब्दीमा नेपाल-भारत दुवैको एउटै उद्देश्य समृद्दि र विकास रहेको उल्लेख गर्दै राजदूत रेले भने, 'दुवै देशको एउटै उद्देश्य छ, त्यो भनेको आर्थिक समृद्धि हो । यसका लागि धेरै प्रयास र प्रयत्न गर्नुपर्छ । त्यसका लागि हामीले रफ्तार बढाउनुपर्छ, भारतको अहिले ७ दशमलवको जीडीपी रेट छ । हामी दोहोर अंकको आर्थिक वृद्धिका पक्षमा छौं । यो भारतले एक्लैले गर्न सक्दैन, चुनौती धेरै छन् । हाम्रा लागि छिमेकी पहिलो प्राथमिकता छ ।'
भारतीय लगानीमा बन्ने अरुण तेस्रोका लागि पनि बजेट स्वीकृति भइसकेकाले अब उक्त प्रोजेक्ट द्रुतगतिमा सञ्चालन हुने उनको विश्वास थियो ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)