काठमाडौं: सहिद स्मारक 'बी' डिभिजन लिगको अन्तिम खेलमा सामाजिक युवा क्लब विजयी भएको छ । एन्फा कम्प्लेक्स सातदोबाटो मैदानमा बुधबार भएको खेलमा सामाजिकले मध्यपुर युथ एसोसिएसनलाई ४-३ गोलले हरायो । यसअघि नै रेलिगेसनमा परेको सामाजिकको यो सान्त्वना जित हो । सामाजिकको जितमा भुवन बस्नेतले ह्याट्रिक गरे ।
भुवनले खेलको पहिलो, २४औं र ६६औं मिनेटमा गोल गरी ह्याट्रिक पुरा गरेका थिए । टोलीका लागी सुरेश खत्रीले पहिलो हाफको इन्जुरी समयमा एक गोल गरेका थिए । मध्यपुरका लागि सबिन डंगोलले ३५औं, यमन राजवाहकले ८६औं र सन्तोष सिंह ठकुरीले दोस्रो हाफको अतिरिक्त समयमा गोल गरेका थिए । सामाजिकसँगको हारले मध्यपुर लिगको ११औं स्थानमा रह्यो ।
लिगमा मंगलबारकै खेलबाट च्यासल युथ क्लबले उपाधि पक्का बनाएको थियो । च्यासलसहित लिगको दोस्रो स्थानमा रहेको न्यूरोड टिम एनआर्टी 'ए' डिभिजनमा उक्लिएका छन् । उपाधिसँगै च्यासलले पाँच लाख प्राप्त गरेको छ । उपविजेता एनआरटीले दुई लाख ५० हजार हात पार्यो । तेस्रो भएको रानी पोखरी कर्नर टीम (आरसीटी)ले एक लाख ५० हजार र चौथो भएको सातदोबाटो युवा क्लबले ७५ हजार पायो ।
लिगमा उत्कृष्ट विधाको पुरस्कारतर्फ पनि च्यासलले बाजी मार्यो । उत्कृष्ट प्रशिक्षकको पुरस्कार च्यासलका चेतनारायण श्रेष्ठले पाए । गोलरक्षकमा च्यासलका राजाबाबु थापा र रक्षकमा च्यासलकै चेतन थारू उत्कृष्ट घोषित भए । उत्कृष्ट मिडफिल्डरको पुरस्कार एनआरटीका सुशील लामा र स्ट्राइकरको पुरस्कार खुमलटारका सुरज राउतले जिते । सुरजले लिगमा सर्वाधिक १० गोल गरेका थिए । सुरजसँगै १० गोल गर्नेमा सामाजिकका भुवन बस्नेत पनि रहे ।
लिगमा १४ टोलीले भाग लिएका थिए, जसबाट दुई टोली 'ए'मा बढुवा र दुई टोली 'सी'मा घटुवा भए । विजेता टोली र खेलाडीलाई राष्ट्रिय खेलकुद परिषद्का सदस्यसचिव केशवकुमार विष्ट, एन्फाका कार्यवाहक अध्यक्ष नरेन्द्र श्रेष्ठलगायतले पुरस्कार प्रदान गरे ।
प्रतिक्रिया दिनुहोस !
